काठमाडौं । प्रधानमन्त्री पुष्पकमल दाहाल ‘प्रचण्ड’ले भारत–पाकिस्तान सम्बन्धका कारण दक्षिण एसियाली क्षेत्रीय सहयोग संगठन (सार्क) सम्मेलन हुन नसकेको बताएका छन् ।

परराष्ट्र मन्त्रालयको बजेटमाथि सांसदले सोधेका प्रश्नको मंगलबार प्रतिनिधिसभा बैठकमा जवाफ दिँदै उनले सम्मेलनको वातावरण बनाइदिन आफूले भारतीय पक्षसँग संवाद गरेको जानकारी गराए ।

नेपाल हाल सार्कको अध्यक्ष रहेको उनले उल्लेख गरे । सम्मेलनमार्फत पाकिस्तानलाई अध्यक्षता हस्तान्तरण गर्नुपर्ने दायित्व र जिम्मेवारी नेपालको भएको उनले स्पष्ट पारे ।

भारत भ्रमणका क्रममा आफू र कानुनमन्त्रीले त्यहाँका विदेशमन्त्री एस जयशंकरलाई यसबारे अवगत गराएको उनले जानकारी दिए । “भारतीय परराष्ट्रमन्त्रीसँग बडो प्रस्टसँग सार्क सम्मेलन आयोजना गर्न समझदारी गर्नुपर्‍यो र अगाडि बढ्नुपर्‍यो भन्ने कुरा राखेका छौँ,” उनले भने, “भारतले त्यसबारे जवाफ दिँदा केही जटिलता छन् भन्दै उहाँले त्यस बेला वातावरण सकारात्मक होस् भन्ने चाहेका छौँ, यहाँ शपथग्रहण चल्दै थियो, उहाँ भारतीय मारिए भन्ने कुरा राख्नुभयो ।”

यस्ता जटिलताबारे बताए पनि सम्मेलनको वातावरण बनाउनतर्फ लाग्ने भारतीय विदेशमन्त्रीले जवाफ दिएको प्रधानमन्त्री प्रचण्डले उल्लेख गरे । “सम्मेलनमार्फत जिम्मेवारी हस्तान्तरण गर्ने ध्यान र पहल भएको जानकारी गराउँछौँ,” उनले भने ।