वासिङ्टन । अमेरिकामा राष्ट्रपति पदका लागि चुनावी सरगर्मी बढ्दै गइरहेको छ । राष्ट्रपति जो बाइडेन र उनका प्रतिद्वन्द्वी डोनाल्ड ट्रम्पबीच पहिलो डिबेट आउन अब एक हप्ता पनि बाँकी छैन । 

उनीहरू दुईमध्ये एक यसपालि राष्ट्रपति पदमा निर्वाचित हुने निश्चित छ । आउँदो साताको बिहीबार सीएनएनमा उनीहरू आमनेसामने भएर बहसमा सहभागी हुनेछन् । आउँदो नोभेम्बर ५ हुने चुनावअघि दुईवटा डिबेटमध्ये यो पहिलो हो  ।

कहाँ र कहिले हुँदै छ डिबेट ?

आउँदो बिहीबार अर्थात् २७ जुनमा राति ९ बजे सुरू हुनेछ । एटलान्टा जर्जियाबाट यो सिएनएनमार्फत लाइभ गरिनेछ । सो कार्यक्रम सिएनएन इन्टरनेसनल, सिएनएन एन इस्पानोल, सिएनएन म्याक्स र सिएनएन वेबसाइटबाट पनि प्रसारण गरिने जनाइएको छ । त्यसलाई बीबीसीले पनि कभरेज गर्ने र विश्लेषण लाइभ ब्लगमा ट्युन गर्न बीबीसीले भनेको छ ।

नियम के के छन् ?

सो डिबेटको भेट्रान सीएनएन एंकर जेक टप्पर र डाना बासले समन्वय गर्ने जनाइएको छ । सो नेटवर्कका अनुसार डिबेट ९० मिनेटसम्म चल्नेछ र दुईवटा कमर्सियल ब्रेक हुनेछन् । दुई उमेदवारको बिहीबार पोडियम प्लेसमेन्ट र क्लोजिङ स्टेटमेन्टका लागि नेपालको शैलीमा भन्ने हो भने गाई कि त्रिशूलशैलीमा सिक्का उफार्ने काम भइसकेको छ । 

जसअनुसार बाइडेन स्क्रिनको दायाँ साइडमा हुनेछन् । बाइडेनको  बायाँ तर्फ ट्रम्प हुनेछन् । अन्तिम वक्ताचाहिँ  ट्रम्प हुनेछन् । अर्थात् क्लोजिङ स्टेटमेन्ट पहिला बाइडेनले दिनेछन् ।

दुवै उमेदवार डिबेटमा उभिने छन् । बाइडेनले बस्नका लागि अनुरोध गरेको भन्ने रिपोर्ट गलत भएको उनको क्याम्पेन सम्बद्धहरूले बताएका छन् ।  सो इभेन्टका क्रममा क्याम्पेनका स्टाफले कुरा गर्न पाउने छैनन् । ब्रेकको समयमा समेत सो अनुमति नभएको बताइएको छ ।

दुवैलाई एक/एक वटा कलम दिइने, पेपरको एउटा प्याड दिने र एक बोतल पानी पनि दिइनेछ । तर, कुनै सामग्री वा पूर्वलिखित नोट स्टेजमा लैजानन अनुमति  छैन ।

पहिलाको जस्तै उनीहरूको माइक्रोफोन बोल्न आवश्यक परेको बेलामाबाहेक म्युट गरिनेछ । साथै स्टुडियो अडियन्स पनि हुने छैनन् र सिएनएनले समय तोकेर सभ्य छलफल गराउनेछ । सन् १९६० पछि पहिलो पटक यसपािल डिबेट चुनावको तिथिभन्दा धेरै अघि हुन लागेको हो । बीबीसी