नयाँ दिल्ली । भारतमा ६ हप्ता लामो समय भएको लोकसभा निर्वाचनको परिणाम आज (मंगलबार) सार्वजनिक गरिँदै छ । ५४२ लोकसभा पदका निम्ति गरिएको निर्वाचनको मतगणना आज बिहान ८ बजेदेखि थालिएको छ ।

सूरतको एक निर्वाचन क्षेत्रको एउटा सिटमा भारतीय जनता पार्टी भाजपा)का उमेदवार यसअघि नै निर्विरोध निर्वाचित भइसकेका छन् ।

सबैभन्दा पहिला पोस्टल मतपत्रको गणना सुरु गरिनेछ । त्यसको आधा घण्टामा ईबीयम (इलेक्ट्रोनिक मतगणना मेसिन)मा रहेका मतपत्रको गणना गरिनेछ । यदि, कुनै मतदान केन्द्रको ब्यालेट पेपर नभए सिधै ईबीएमका मतको गणना गरिने जनाइएको छ ।

भारतका मुख्य चुनाव आयुक्त राजीव कुमारले सोमबार पत्रकार सम्मेलनको आयोजना गरी अप्रिल १९ देखि जुन १ सम्म विभिन्न सात चरणमा भएको मतदानका क्रममा कुल ९६.८ करोड मतदातामध्ये ६४.२ करोडले मतदाताको अधिकार प्रयोग गरेका जनाएका छन् । मतदानमा ३१.२ करोड महिलामध्ये औसतमा ५८.५८ प्रतिशतले मतदान गरेका आयोगको तथ्यांक छ ।

निर्वाचनमा १.५ करोड सुरक्षाकर्मी सामेल भएको र ६८ हजार मानिसको  निगरानी टोली बनाइएको थियो ।

आजको मतगणना सकिएपछि भारतको भावी प्रधानमन्त्री को हुने भन्ने टुंगो लाग्नेछ । ‘एक्जिट पोल’मा नरेन्द्र मोदी नै तेस्रो कार्यकालका निम्ति प्रधानमन्त्री हुने अनुमान गरिएको छ । विपक्षी गठबन्धनको नेतृत्व गरिरहेको कांग्रेसले एक्जिट पोल अस्वीकार गर्दै आएको छ । बीबीसी हिन्दीबाट ।