काठमाडौं । प्रमुख प्रतिपक्ष दल नेपाली कांग्रेसकी सांसद ईश्वरी न्यौपानेले सिंहदरबार जनताको हो कि होइन भन्दै प्रश्न गरेकी छन् । उनले चप्पल, हाफपाइन्ट लगाएर आउने जनताले किन सिंहदबार छिर्न नपाउने भन्दै प्रश्न गरिन् ।

आइतबार प्रतिनिधिसभा बैठकको आकस्मिक समयमा उनले यो विषयमा सभामुखबाट ‘रुलिङ’ नै माग गरिन् । दुर्गमका जनता काठमाडौंसम्म आइपुग्न गाह्रो हुने र आएकाले संसद् भवन हेर्न चाहने भए पनि रोकिएको उल्लेख गरिन् ।

उनले भनिन्, “कारण के हो मैले बुझ्न सकिनँ । त्यसपछि मैले सोधेँ– किन उहाँहरूलाई माथि जानबाट रोकियो ? खुट्टामा चप्पल लगाएका छन्, त्यसकारण माथि जान पाउँदैनन् भनियो । सरकारको नियम होला भनेर मनमा दबाएर राखेँ ।”

सांसदहरू चप्पल लगाएर संसद् भवनमा आइरहेको तर नागरिकलाई रोकिएको भन्दै उनले आपत्ति जनाइन् । उनले आफ्नै घटना सुनाउँदै भनिन्, “अस्ति मोटरसाइकलमा सिंहदरबार गएँ । गेटमा आईडी देखाएँ । प्रहरी दगुर्दै मेरो पछिपछि आइराखेपछि मैले बाइक रोक्न लगाएँ । किन दौडिएको ? म सांसद हुँ, आईडी देखाएर आएको हुँ भनेर मैले भनेँ । त्यो प्रहरीले भन्यो– माननीयज्यू, तपाईंलाई होइन, बाइक चलाउने भाइलाई रोकेको भन्नुभयो । किन ? भन्दा त्यो भाइले हाफपाइन्ट लगाएको छ, जान पाउँदैन भनियो ।”

सांसदलाई चप्पल र जस्तो पोसाक लगाए पनि छुट, जनतालाई चाहिँ बन्देज ? भन्ने प्रश्न उनले संसद् बैठकमा गरिन् । “बिचरा जनताहरू ! चप्पल लगाएर संसद् आउन नपाउने ? हाफपाइन्ट लगाएर सिंहदरबार जान नपाउने ? यसमा सभामुखमार्फत रुलिङ चाहन्छु,” उनले भनिन् ।