काठमाडौं । प्रधानमन्त्री पुष्पकमल दाहाल ‘प्रचण्ड’ले अपराध नियन्त्रण तथा अनुसन्धान गर्दा मानवअधिकारको संरक्षणमा पनि ख्याल गर्न प्रहरीलाई निर्देशन दिएका छन् । 

शुक्रबार नेपाल प्रहरीको प्रहरी निरीक्षक आधारभूत तालिम १–१८२औँ समूहको दीक्षान्त समारोहलाई सम्बोधन गर्दै प्रधानमन्त्री प्रचण्डले नेपाल प्रहरी, कानुनी राज्यको मूल अवधारणाबाट निर्दिष्ट रही प्रभावकारी रूपमा अपराध नियन्त्रण र अनुसन्धान गरी समाजमा शान्ति सुव्यवस्था कायम गर्न तथा मानवअधिकारको संरक्षणमा समेत ख्याल गर्न निर्देशन दिएका हुन् । 

प्रहरीले कार्यक्षेत्रमा आउनसक्ने हर चुनौतीको सामना गर्न र २१औँ शताब्दीअनुसारको अनुसन्धान गर्न निर्देशन दिँदै उनले प्रहरीले पदीय दायित्वलाई कुशलतापूर्वक निर्वाह गरेर राज्यप्रतिको जिम्मेवारी पूरा गर्नुपर्ने बताए । 

दीक्षित हुने प्रहरी निरीक्षकहरूलाई सम्बोधन गर्दै उनले प्रविधिको विकाससँगै अपराधका शैली पनि फेरिएको र सोहीअनुसारको तालिमको व्यवस्था गर्न सरकारले प्रविधिमैत्री तालिम केन्द्र पनौतीमा निर्माण गरिरहेको जानकारी दिए । 

त्यस्तै, दीक्षान्त समारोहमा उपप्रधान तथा गृहमन्त्री रवि लामिछानेले प्रहरी कर्मचारी कहिलेकाहीँ आफ्नो जिम्मेवारीलाई भुलेर कानुनविपरीतका कर्ममा लागेका स्मरण गराउँदै दीक्षित निरीक्षकलाई कानुनले दिएको अधिकारबाट च्यूत नहुन निर्देशन दिए ।

१८ महिनादेखि सुरू भएको निरीक्षक आधारभूत तालिम १–१८२ औँ समूहमा कुल १४९ प्रहरी निरीक्षकले तालिम लिएका थिए । त्यसमध्ये १८ जना महिला प्रहरी निरीक्षक छन् ।

समारोहमा आईजीपी बसन्तबहादुर कुँवरले प्रहरीको निलो बर्दीलाई शक्तिको रूपमा नलिइ जिम्मेवारी ठानेर काम गर्दा देश र संगठनको साख जोगिने बताए ।