जेरुसेलम । इजरायली सेनाले पूर्वी रफाह क्षेत्रमा आक्रमण सुरू गरेको जनाएको छ । इजरायली डिफेन्स फोर्स आईडीएफका अनुसार उसले हमासविरुद्ध ‘टार्गेटेड स्ट्राइक’का रूपमा सो आक्रमण सुरू गरेको हो । रफाहमा रहेका ठूलो संख्याका शरणार्थीलाई सो स्थान छोडेर राहत क्याम्पमा जान आग्रह गरिएको छ । 

इजरायलले खान युनिस छेउको एक क्याम्पबाट एक लाख मानिसलाई निकाल्न आदेश दिएको थियो । एकातर्फ इजरायलले आक्रमण सुरू गरेको छ भने अर्कातर्फ हमासले राखेको युद्धबिरामका लागि तय गरेका सर्तलाई अस्वीकार गरेको छ । मध्यस्थकर्ताको पहलमा इजिप्टको कायरोमा हमाससँग सहमतिको प्रयास भइरहेको छ । 

इजरायलले सो वार्तास्थलमा आफ्नो प्रतिनिधिमण्डल पठाउने जानकारी दिएको छ । हमासले युद्धविरामका लागि अघि सारेका सर्त इजरायलको मागबाट कोसौं टाढा रहेको इजरायलको भनाइ छ । हमास सम्मिलित वार्तालाई कतार र इजिप्टले मध्यस्थकर्ताको भूमिका निर्वाह गरिरहेका छन् । हमासले के सर्त अघि सारेको छ भन्ने कुरा अहिलेसम्म खुलाइएको छैन ।

संयुक्त राष्ट्र संघका महासचिव एन्टोनियो गुटरेसले हमास र इजरायलबीच सहमतिका लागि अतिरिक्त प्रयास हुनु जरूरी रहेको भन्दै यसका लागि सम्बद्ध पक्षलाई अपील गरेका छन् । बीबीसी