जकार्ता । इन्डोनेसियामा रुवाङ ज्वालामुखीको खतरामा रहेका स्थानीय सबै  मानिसलाई स्थायी रूपमै अन्यत्र सार्ने तयारी गरिएको छ । सो क्षेत्रमा शृंखलाबद्ध रूपमा ज्वालामुखी उठ्न थालेपछि सरकारले उक्त कदम चाल्न लागेको जनाइएको छ ।

करिब नौ हजार ८०० मानिस सो प्रायदीपमा बस्ने गरेका जनाइएको छ । उत्तरी सुलावेसी प्रान्तस्थित रुवाङमा हालैका हप्तामा ज्वालामुखी फुट्ने क्रम बढेको छ ।

अधिकारीहरूले यो साता ज्वालामुखी विस्फोटको उच्च खतरा औँल्याएका थिए । मानादोस्थित विमानस्थल पनि बन्द गरिएको छ । हिमालको केही भाग भत्किएमा सुनामी समेत आउन सक्ने चेतावनी दिइएको छ ।

सयौँ सामान्य र स्थायी घर बनाएर बोलाङ मोन्गोन्डो क्षेत्रमा प्रभावित मानिसलाई सार्न लागिएको मानव विकासमन्त्री मुहादजीर इफेन्डीले बताएका छन् । राष्ट्रपति जोको विडोडोले घरहरू विपद्को मापदण्डअनुसार बनाउन निर्देशन दिएका छन् । सीएनएनबाट ।