काठमाडौं । प्रतिनिधिसभा सदस्य ज्ञानेन्द्रबहादुर शाहीले कर्णालीका पाँच जिल्लाको बजेट सुगमको एक जिल्लाको जतिको पनि नभएको बताएका छन् । 

बिहीबार बसेको पूर्वाधार विकास समितिको बैठकमा सांसद शाहीले राराताल जोड्ने र कालीकोट जोड्ने बाटो पिच गर्न पनि आग्रह गरे । उनले रारा जाने सडक गत वर्ष ६ किलोमिटर पिच भएकाले बाँकी बाटो पिच गर्न बजेट निकासाको माग गरे । 

नेपाली भाषाको उत्पत्ति भएको सिंजा जाने बाटो पिच गर्नुपर्ने भन्दै उनले रारा जाने पर्यटक दोस्रो पटक बाटोकै कारण नजाने अवस्था रहेको बताए । 

जुम्ला, मुगु, रारा जोड्ने बाटोको अवस्था अस्तव्यस्त रहेको भन्दै सांसद शाहीले अहिले, सुरुङ, डबल कटिङ्ग, रेलको आवश्यकता पनि औँल्याए । कर्णालीमा रहेको जडीबुटी स्याउ र पर्यटनलगायतका लागि बाटो अत्यावश्यक रहेको उनको भनाइ छ ।