काठमाडौं । सञ्चार तथा सूचना प्रविधिमन्त्री रेखा शर्माले नेपालमा छिट्टै आईटी हबको विकास गर्न जरुरी रहेको बताएकी छन् ।
लगानी सम्मेलनका क्रममा सोमबार उनले नेपालमा बढ्दै गएको सूचना प्रविधिसम्बन्धी सेवा निर्यातलाई प्रवर्द्धन गर्न सूचना प्रविधि उद्योग र स्टार्टअपलाई एकै थलोबाट सञ्चालन गर्न आवश्यक पूर्वाधारको अभाव रहेको उल्लेख गरिन् । उनले सो अभावलाई परिपूर्ति गर्न चाँडो आईटी हबको विकास जरुरी रहेकामा जोड दिइन् ।
उनले आईटी हबको विकास गर्नाले देशभित्र र बाहिरका लगानीकर्ताको पुँजी तथा सूचना प्रविधि क्षेत्रका दक्ष जनशक्तिको ज्ञान, सीप र श्रमको एकीकृत परिचालन गर्ने वातावरण बन्ने विश्वास व्यक्त गरिन् । सूचना प्रविधि उद्योगको प्रवर्द्धनका निम्ति देशभित्र र बाहिरका सानाठूला सबै लगानीकर्तासँग सहकार्य गर्न सरकार तयार रहेको उनले स्पष्ट पारिन् ।
मन्त्री शर्माले विश्वस्तरमा भएका एआई, क्लाउड कम्प्युटिङ, आईओटी, ब्लकचेनजस्ता नयाँ प्रविधिको विकास र विस्तारबाट नेपालले कसरी लाभ लिने भनेर तयारी पनि गरिरहेको बताइन् । सञ्चार मन्त्रालयले लगानी सम्मेलनमार्फत अघि सारेका विभिन्न परियोजनामा लगानीको वातावरण बनाउन उनले लगानीकर्ताको ध्यानाकर्षण गराइन् ।
सूचना प्रविधि उद्योगका निम्ति नेपाल विदेशी लगानीकर्ताका लागि समेत उपयुक्त स्थल भएको उनको भनाइ छ । सूचना प्रविधिको क्षेत्रमा नेपालमा दक्ष जनशक्ति भएकाले कम लागतमा आईटी उद्योग सञ्चालन गर्न सकिने प्रचुर सम्भावना रहेको उनले बताइन् ।
मन्त्री शर्माले सूचना प्रविधिसँग सम्बन्धित नीतिलाई सरकारले समयानूकल परिमार्जन गरिरहेको पनि बताइन् । न्युज एजेन्सी नेपाल
