काठमाडौं । उपप्रधान एवं गृहमन्त्री रवि लामिछानेले सहकारी प्रकरणमा आफूमाथि लगाइएको आरोप पुष्टि गर्न नेपाली कांग्रेसलाई चुनौती दिएका छन् ।
शनिबार काठमाडौंमा राष्ट्रिय स्वतन्त्र पार्टी (रास्वपा)ले आयोजना गरेको कार्यक्रममा उनले एउटा ठाडो उजुरीलाई लिएर सदन नै अवरुद्ध गर्न खोजिएको बताए । आफूलाई सदनमा बोल्न समेत नदिएको भन्दै उनले आरोप पुष्टि गर्न कांग्रेसलाई चुनौती दिएका हुन् ।
कांग्रेसजस्तो इतिहास बोकेको पार्टीले प्रमाणविना बोलेको उनले उल्लेख गरे । कांग्रेसकै नेता तथा विज्ञमाझ सार्वजनिक रूपमा यस विषयमा बहस गर्न आफू तयार रहेको उनले बताए ।
रास्वपाका सभापति समेत रहेका लामिछानेले आफूले यसअघि नै छाडेको संस्थासँग जोडेर विभिन्न प्रकरणमा मुछ्ने काम गरिएको जिकिर गरे । जीबी राईलाई आकाश–पाताल जहाँबाट भए पनि खोजेरै ल्याउने उनको भनाइ छ ।
सहकारी बचतकर्ताको रकम ब्याजसहित फिर्ता नगरेसम्म राजनीतिबाट विश्राम नलिने उनले बताए ।
यस्तै, विभिन्न प्रकरणमा मुछिएकालाई प्रमाणका आधारमा जस्तोसुकै ओहोदामा भए पनि नछाड्ने उनले स्पष्ट पारे । जतिसुकै ठूला ‘माछा’ भए पनि नागरिकले दिएको शक्तिका अगाडि तिनको केही नलाग्ने उनले बताए ।
कांग्रेसलाई प्रधानमन्त्रीले गलत्याएर सरकारबाट फ्याँकेको जस्तो अवस्थामा आफूहरू नपुग्ने भन्दै लामिछानेले काम गर्न नसके राजीनामापत्र अहिलेदेखि झोलामा तयार रहेको सुनाए ।
उनले आफूहरू जोखिम मोलेर सरकारमा गएको भन्दै काम गर्न एक मिनेट पनि समय खेर नफाल्ने बताए । जिम्मेवारीमा रहेका दिनसम्म आफ्नो अन्तिम दिन भनेर काम गर्न पार्टीका तर्फबाट मन्त्रीहरूलाई निर्देशन दिइएको उनले उल्लेख गरे । सरकारमा रहँदा जनताको मतको दुरुपयोग नगर्ने उनको भनाइ छ । हिमालयन टेली भ्वाइस
