काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले संसद् बैठक कर्मकाण्डको लागि मात्रै चलाइराख्नुको कुनै औचित्य नभएको बताएका छन् । 

शुक्रबार प्रतिनिधिसभाको बैठकमा बोल्दै अध्यक्ष लिङ्देनले जनताको समस्याको ठोस समाधान गर्ने सरकारको जवाफ नआएसम्म कर्मकाण्डको लागि मात्रै संसद् चलाइराख्नुको कुनै औचित्य नभएको बताए । मिटरब्याजपीडित, लघुवित्त र सहकारीका ऋणीहरूको समस्या समाधानमा सरकार जिम्मेवार हुनुपर्ने बताए ।

उनले व्यवसायीको समस्या, रूसी सेनामा नेपाली भर्ती भएका विषय संसद्‌मा चर्को रूपमा उठे पनि सरकारले नसुनेको उनको भनाइ थियो । संसद्‌मा उठेका आवाज सरकारले नसुने संसद्‌मा बोल्नुको कुनै अर्थ नभएको बताए । सरकार र राजनीतिक दलको काम के हो ? भनि प्रश्न समेत गरे ।

उनले भने, "सरकारले संसद्‌मा उठेका विषयमा ठोस जवाफ नदिएसम्म, सरकारको उपस्थिति संसद्‌मा नभएसम्म संसद् अगाडि बढाइराख्नुको कुनै औचित्य छैन । केबल कर्मकाण्डको लागि मात्रै यो संसद् चलाइराख्नु र जनताले रगत, पसिना बगाएर तिरेको तिरोमाथि रमाइलो गरेर बस्नुको कुनै औचित्य छैन । ठोस जवाफ नआएसम्म संसद् अगाडि बढ्दैन ।"