काठमाडौं । स्वास्थ्य तथा जनसंख्या मन्त्रालयअन्तर्गतका एघारौँ तहका तीनसहित २०० धन्दा धेरै कर्मचारी फाजिलमा राखिएका छन् । पूर्वनिर्देशकहरूसहित २०९ जना जिम्मेवारीविहीन रहेको मन्त्रालयको तथ्यांक छ ।
फाजिलमा राखिनेमा पूर्व एघारौँ तहका पूर्वनिर्देशक भइसकेका कर्मचारीसमेत छन् । जिम्मेवारीविहीन हुनेमा राष्ट्रिय स्वास्थ्य तालिम केन्द्रका पूर्व निर्देशक डा. यदुचन्द्र घिमिरे, जनस्वास्थ्य प्रशासक डा. प्रकाश साह र डा. राधिका थपलिया छन् । उनीहरू तीनैजना एघारौँ तहका कर्मचारी हुन् ।
डा. घिमिरेलाई तालिम केन्द्रको निर्देशकबाट हटाउँदै गत जेठमा स्वास्थ्य मन्त्रालयमा ल्याइएको थियो । दश महिनाअघिदेखि मन्त्रालयमा हाजिर हुँदै आएका घिमिरेले गएको दसैँयताको तलब पाएका छैनन् ।
डा. राधिका थपलिया यसअघि राष्ट्रिय स्वास्थ्य शिक्षा सूचना तथा सञ्चार केन्द्रको निर्देशकको जिम्मेवारीमा थिइन् । समायोजनका क्रममा सुर्खेत सरुवा भएपछि आफ्नो दरबन्दी नभएको भन्दै अदालत पुगेकी थपलियालाई सर्वोच्चको आदेशले विभागमा फिर्ता हुने बाटो त खुलायो । तर, साढे दुई वर्षदेखि उनी जिम्मेवारीविहीन छिन् ।
विभागको संस्थागत संरचनामा उनको नाम उल्लेख भए पनि सेवा समूह र जिम्मेवारी छुट्याइएको छैन । जिम्मेवारी मात्र नभई उनले गएको साउनयताको तलब सुविधासमेत पाएकी छैनन् ।
यसअघि गजेन्द्र नारायण सिंह अस्पतालको मेडिकल सुपरिटेन्डेन्ट रहेका डा. प्रकाश साह गएको कार्तिकदेखि मन्त्रालय तानिएका छन् । स्वास्थ्य सेवा विभागमा दरबन्दी रहेका उनलाई मन्त्रालयमा कुनै जिम्मेवारी दिइएको छैन । जनस्वास्थ्य प्रशासकको सेवा समूहमा रहेका डा. साह गएको मंसिरदेखि तलब सुबिधा नपाएको बताउँछन् ।
आफूलाई मिल्ने दरबन्दी इपिडिमियोलोजी तथा रोग नियन्त्रण महाशाखामा हुँदाहुँदै पनि स्वास्थ्यमन्त्री मोहनबहादुर बस्नेतले ‘आफ्ना मान्छे’लाई नियुक्त गरेको र आफूहरूलाई जिम्मेवारीविहीन बनाएको डा. साह बताउँछन् ।
मन्त्रालयले भने एघारौँ तहका तीनजनालाई विशेष जिम्मेवारी दिने तयारी भइरहेको जनाएको छ । कर्मचारी प्रशासनअन्तरगत मन्त्रालयका उपसचिव कृष्ण थापा महिनौँदेखि उच्च तहका कर्मचारी जिम्मेवारीविहीन रहनु गम्भीर विषय भएको र यसबारे छिट्टै ठोस निर्णय गरिने बताउँछन् ।
ओएनएम सर्भे गर्दा केही दरबन्दी काटिएकाले कर्मचारीहरू फाजिलमा पर्न गएको र दरबन्दीमा नअटेकै कारण तलब सुविधाबाट वञ्चित भएको उनको तर्क छ ।
मन्त्रालयमा फागुन पहिलो सातासम्म २०९ जना कर्मचारी फाजिलमा रहेको मन्त्रालयको कर्मचारी प्रशासन शाखाको तथ्यांक छ । समायोजनका क्रममा दरबन्दीविहीन बनेका कर्मचारीलाई व्यवस्थापन गर्न गृहकार्य भइरहेको उपसचिव थापा बताउँछन् ।
मन्त्रालयले विभिन्न चरणमा गरी चौथोदेखि दशौँसम्म गरी २६ हजार ७१७ कर्मचारी समायोजन गरेको थियो ।
