काठमाडौं । गत कार्तिकमा जाजरकोट केन्द्रविन्दु भएर गएको भूकम्पपछि प्रधानमन्त्री दैवी प्रकोप सहायता कोषमा सवा २९ करोड रुपैयाँ जम्मा भएको छ । 

भूकम्प पीडितको सहयोगका लागि १३६ जना व्यक्ति तथा संस्थाले २९ करोड १९ लाख ९५ हजार १३९ रुपैयाँ कोषमा जम्मा गरेको प्रधानमन्त्री तथा मन्त्रिपरिषद्को कार्यालयले जनाएको छ । 

गत कार्तिक १७ गते जाजरकोट केन्द्रविन्दु बनाएर ६.४ म्याग्निच्युडको भूकम्प गएको थियो । भूकम्पका कारण थुप्रै संरचना भत्किँदा १५४ जनाको मृत्यु भएको थियो । साढे ३०० जनभन्दा बढी घाइते भएका थिए ।

भूकम्पले जाजरकोट, रुकुमपश्चिमलगायतका जिल्लामा ६० हजारभन्दा बढी घरमा क्षति गरेको थियो ।

भूकम्पले ठूलो जनधनको क्षति गरेपछि सरकारले भूकम्प पीडितको सहयोगार्थ कोषमा रकम जम्मा गर्न अनुरोध गरेको थियो । त्यसपछि फागुन ५ गतेसम्मको अवधिमा उक्त रकम कोषमा जम्मा भएको हो ।