काठमाडौं । एनसेलको सेयर खरिद–बिक्रीसम्बन्धी छानबिन एवं अध्ययन गर्न गठित समितिले तयार पारेको प्रतिवेदन सरकारलाई बुझाएको छ ।

सोमबार समितिले प्रधानमन्त्री पुष्पकमल दाहाल 'प्रचण्ड'लाई प्रतिवेदन हस्तान्तरण गरेको हो ।

एनसेलको मुख्य कम्पनी आजियाटाले गएको डिसेम्बर १ मा आफ्नो सेयर स्वामित्व बिक्री गर्दै नेपालबाट बाहिरिएको घोषणा गरेको थियो । 

हालसम्म कम्पनीले सेयर खरिद–बिक्रीका निम्ति प्राधिकरणबाट स्वीकृति भने लिएको छैन ।

आजियाटाले उद्योग विभागलाई भने आफ्नो ८० प्रतिशत सेयर बिक्री गरेको जानकारी गराइसकेको छ ।

आजियाटाको बेलायतमा रहेको कम्पनी आजियाटा यूके लिमिटेडले आफ्नो स्वामित्वमा रहेको एनसेलको ८० प्रतिशत सेयर स्पेक्ट्रलाइट यूके लिमिटेडलाई बिक्री गरेको जनाएको थियो । 

स्पेक्ट्रलाइट यूके लिमिटेड नेपाली मूलका व्यापारी सतिशलाल आचार्यको कम्पनी हो ।

कम्पनी रजिस्ट्रार कार्यालयका अनुसार, एनसेलको ८० प्रतिशत सेयर विदेशी कम्पनी रेनोल्ड्स होल्डिङको नाममा छ । सोही कम्पनीको स्वामित्व आजियाटा यूकेले स्पेक्ट्रलाइटलाई बेचेको हो ।

एनसेलको २० प्रतिशत सेयर नेपाली कम्पनी सुनिभेरा क्यापिटल भेन्चरको नाममा छ ।

अस्वाभाविक मूल्य र प्रक्रियामा सेयर खरिदबिक्री भएको देखिएपछि यो विषयले देशव्यापी चर्चा पाएको थियो । 

यही प्रकरण छानबिन गर्न सरकारले पूर्वमहालेखा परीक्षक टंकमणि शर्माको संयोजकत्वमा पाँच सदस्यीय समिति गठन गरेको थियो ।

छानबिन समितिको सदस्यमा नेपाल सरकारका सचिव फणिन्द्र गौतम, सहसचिव बाबुराम भण्डारी, सहसचिव हृदयेशकुमार शाक्य र आइक्यानका अध्यक्ष सुजनकुमार काफ्ले रहेका थिए ।