काठमाडौं । वैदेशिक रोजगारीका निम्ति ओमन पठाइदिने भन्दै रकम ठगी गरेको आरोपमा प्रहरीले एकजनालाई पक्राउ गरेको छ । पक्राउ पर्नेमा सिन्धुपाल्चोकको मेलम्ची नगरपालिका–११ का उज्वलराज पाण्डे छन् ।

पाण्डेलाई आइतबार (हिजो) काठमाडौंको बौद्धबाट पक्राउ गरिएको हो । उनी बौद्धमा बस्दै आएका थिए ।

पाण्डेले विवेक सुनारसहित तीनजनालाई वैदेशिक रोजगारीका निम्ति ओमन पठाइदिने बताएका थिए । त्यसका निम्ति प्रतिव्यक्ति दुई लाख ५० हजार रुपैयाँ लाग्ने उनको भनाइ थियो ।

ओमन पुगेपछि प्रतिष्ठित कम्पनीमा काम लगाइदिने र मासिक ६० हजार रुपैयाँ तलब हुने भन्दै प्रलोभनमा पारेको उनीमाथि आरोप छ । उनले पीडितबाट पटक–पटक गरी पाँच लाख ३० हजार रुपैयाँ लिई सम्पर्कविहीन भएको खुलेको काठमाडौं उपत्यका अपराध अनुसन्धान कार्यालयका एसपी रवीन्द्र रेग्मीले जानकारी दिए ।

थप अनुसन्धान तथा कारबाहीका निम्ति उनलाई वैदेशिक रोजगार विभागमा पठाइएको प्रहरीले जनाएको छ ।