काठमाडौं । जाजरकोट भूकम्प प्रभावित जिल्लाहरूमा २० हजारभन्दा बढी अस्थायी आवास निर्माण सम्पन्न भएको छ ।  

राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले भूकम्पपछि सो क्षेत्रमा अस्थायी आवास निर्माण कार्य भइरहेको बताए । 

“भूकम्प प्रभावित जिल्लामा हालसम्म २० हजार १४७ वटा अस्थायी आवास निर्माण सम्पन्न भएका छन्,” पोखरेलले बाह्रखरीसँग भने, “१० हजार ३०५ वटा अस्थायी आवासको अहिले निर्माण कार्य भइरहेको छ ।” 

गत कात्तिक १७ गते जाजरकोटलाई केन्द्रविन्दु बनाएर गएको ६.४ म्याग्निच्युडको भूकम्पले ठूलो जनधनको क्षति गरेको थियो । त्यसको केही साताअघि बाजुरा केन्द्रविन्दु भएर गएको भूकम्पले पनि ठूलो क्षति गरेको थियो । 

कार्यकारी प्रमुख पोखरेलका अनुसार भूकम्प प्रभावित जाजरकोट, रुकुम पश्चिम, सल्यान, बझाङ र बाजुरामा ८० हजार १५० वटा अस्थायी आवास निर्माण गर्नुपर्ने प्रारम्भिक अनुमान छ । 

प्रारम्भिक अध्ययनले जाजरकोटमा ४० हजार, रुकुम पश्चिममा ३० हजार ५००, सल्यानमा २ हजार, बझाङमा चार हजार ७५० र बाजुरामा दुई हजार ९०० वटा अस्थायी अवास निर्माण गर्नुपर्ने देखाएको थियो । 

हालसम्म जाजरकोटमा ९ हजार ६३८, रुकुम पश्चिममा १० हजार ४२३, सल्यानमा ७१ र बझाङमा १५ वटा अस्थायी आवास निर्माण भइसकेको प्राधिकरणका कार्यकारी प्रमुख पोखरेलले जानकारी दिए । 

यस्तै, अहिले जाजरकोटमा ४३६, रुकुम पश्चिममा ९ हजार ६६४, बझाङमा ३७ र बाजुरामा १६८ वटा अस्थायी आवासको निर्माण कार्य भइरहेको छ । 

भूकम्प प्रभावित जिल्लामा अस्थायी आवास निर्माणको लागि चार अर्ब ७५ लाख रुपैयाँ लाग्ने अनुमान छ । उक्त रकममध्ये जाजरकोटमा दुई अर्ब रुपैयाँ, रुकुम पश्चिममा एक अर्ब ५२ करोड ५० लाख रुपैयाँ, सल्यानमा १० करोड रुपैयाँ, बझाङमा २३ करोड ७५ लाख रुपैयाँ र बाजुरामा १४ करोड ५० लाख रुपैयाँ आवश्यक पर्नेछ । 

प्राधिकरणले अस्थायी आवास निर्माणका लागि हालसम्म जिल्लास्थित कोषमा दुई अर्ब २६ करोड रुपैयाँ पठाइसकेको छ । 

प्राधिकरणले अस्थायी आवास निर्माण गर्न जाजरकोट जिल्लामा एक अर्ब चार करोड रुपैयाँ, रुकुम पश्चिममा ८४ करोड रुपैयाँ, सल्यानमा सात करोड रुपैयाँ, बझाङमा २५ करोड रुपैयाँ र बाजुरामा ६ करोड रुपैयाँ पठाइसकेको छ । 

जिल्लाले अस्थायी आवास निर्माण गर्न ६७ हजार ७८० लाभग्राहीको लागि सम्बन्धित स्थानीय तहहरूमा हालसम्म एक अर्ब ६० करोड ९८ लाख २५ हजार रुपैयाँ पठाएको छ । 

प्राधिकरणका अनुसार स्थानीय तहहरूले हालसम्म ४५ हजार ९१३ लाभग्राहीलाई अस्थायी आवास निर्माण गर्न ९९ करोड ३३ लाख ७५ हजार रुपैयाँ उपलब्ध गराइसकेको छ । 

स्थानीय तहबाट अस्थायी आवास निर्माण गर्न रकम बुझ्ने लाभग्राहीमा जाजरकोटमा २५ हजार २०४, रुकुम पश्चिममा १९ हजार ७१७, सल्यानमा ५८०, बझाङमा १२४ र बाजुरामा २८८ जना रहेका छन् ।