काठमाडौं । कैलालीको धनगढीमा यौनिक तथा लैंगिक अल्पसंख्यक (एलजीबीटीआईक्यू) समुदायका एक जोडीको विवाहले कानुनी मान्यता पाएको छ । 

चार वर्षअघि विवाह गरेका कैलालीको कैलारी गाउँपालिका–८ का प्रकाश चौधरी र दाङको तुलसीपुर उपमहानगरपालिका–१ की  मनिला न्यौपानेको विवाहले मान्यता पाएको हो । 

उनीहरू दुवैजना ट्रान्सजेन्डर समुदायका हुन् । शुक्रबार कैलारी गाउँपालिका–८ को कार्यालयले उनीहरूलाई विवाह दर्ताको प्रमाणपत्र उपलब्ध गराएको हो ।

समलिंगी विवाहलाई कानुनी मान्यता दिलाउन निल हिरा समाजकी अध्यक्ष पिंकी गुरुङको नेतृत्वमा सो समुदायका १० जनाको समूहले सर्वोच्च अदालतमा मुद्दा लडिरहेको थियो । 

२०८० असार १३ गते सर्वोच्च अदालतले समलिंगी विवाह दर्ता गर्न सरकारका नाममा अन्तरिम आदेश दिएको थियो । 

यसअघि लमजुङको दोर्दी गाउँपालिकाले नेपालमै पहिलोपटक समलिंगी जोडी माया गुरुङ र सुरेन्द्र पाण्डेको विवाहको अस्थायी दर्ता गराएको थियो ।