काठमाडौं । राष्ट्रिय योजना आयोगका उपाध्यक्ष मीनबहादुर श्रेष्ठले अहिलेको संरचना चलाउन नहुने बताएका छन् ।
बिहीबार आयोगको हलमा आयोजित पत्रकार सम्मेलनामा बोल्दै उपाध्यक्ष श्रेष्ठले अहिलेको संरचनालाई बलियो बनाएर लैजानुको विकल्प नभएको बताएका हुन् ।
“अहिले प्रदेशले काम गरेनन् भनिन्छ । तर, काम गर्न उपयुक्त कानुन बनाइएको छैन,” उनले भने, “राजनीति स्थिर भए सबै सहज हुन्छ । तर, अहिलेको संरचनामा काम गर्ने वातावरण बनाउनुपर्छ ।”
१६औँ पञ्चवर्षीय योजनाको ड्राफ्ट तयार पारिरहेको भन्दै तीन वटै तहलाई ध्यानमा राखेर तयार गरिएको उनले बताए । १६औँ योजनाको सुझाव लिने क्रममा संघीयतालाई प्रभावकारी बनाउनु पर्नेमा सरोकारवालाबाट आवाज उठेको श्रेष्ठले बताए ।
त्यस्तै, सुझावको क्रममा योजना आयोगले १६औँ योजनामा प्रदेशलाई अधिकार सम्पन्न बनाउनुपर्ने पनि आवाज उठेको उनले बताए । संघीयतालाई अधिकार सम्पन्न गर्न सके आर्थिक वृद्धिले फड्को मार्ने उपाध्यक्ष श्रेष्ठको भनाइ छ ।
योजना बनाउँदा विगतलाई हेरेर बनाइने पनि उनले बताए । “१६औँ पञ्चवर्षीय योजना यस्तो नै बन्छ भन्ने फाइनल भएको छैन । हामीले यसकार तयारी गरिरहेका छौँ । हामीले पाँच वर्षमा ८० खर्बको अर्थतन्त्र बनाउने लक्ष्यमा छौं,” उनले भने, “क्षेत्रगत अध्ययन गरिरहेका छौँ । मन्त्रालयगत कार्ययोजना पनि माग्नेछौँ ।”
आगामी आर्थिक वर्षको बजेटमा राष्ट्रिय आयोजना बैंकमा प्रविष्ट भई आवश्यक मापदण्ड पूरा गरेका आयोजना र कार्यक्रममा मात्र बजेट विनियोजन गरिने पनि उनले बताए ।
बजेट तयारीमा पर्याप्त गृहकार्य गरेर हरेक कार्यक्रमको तर्कसहित कार्यक्रम प्रस्ताव गर्न पनि भनिने श्रेष्ठले बताए । मापदण्ड पूरा नगरेका आयोजनालाई बजेटमा समावेश नगर्ने पनि आयोगको भनाइ छ ।
