काठमाडौं । नेपाल वायुसेवा निगमले आफू आन्तरिक स्रोतबाट नयाँ जहाज खरिद गर्न सक्षम रहेको जनाएको छ । 

निगमले दुर्गम क्षेत्रमा उडान गर्न थप तीनवटा जहाज खरिद गर्ने तयारी गरेको छ । तर, निगमको खुद सम्पत्ति आठ अर्ब मात्रै छ भने दीर्घकालीन ऋण करिब ४८ अर्ब छ ।

जहाज खरिदको विषयमा सार्वजनिकरूपमा विभिन्न प्रश्न उठेपछि निगमले आफू आन्तरिक स्रोतबाटै जहाज खरिद गर्न सक्षम रहेको बताएको हो ।

“आर्थिक स्रोतको सम्बन्धमा निगमले तीनवटा ‘स्टल रुट’मा उड्ने जहाज ६/६ महिनाको अन्तरमा ल्याउने भएकाले सम्पूर्ण रकम एकमुष्ट तिर्ने नभई पटकपटक तिर्दै जाने हुँदा सोको व्यवस्थापन आन्तरिक स्रोतबाट गर्न निगम सक्षम छ,” निगमले जारी गरेको प्रेस विज्ञप्ति भनिएको छ ।

साथै जहाज खरिद पारदर्शी ढंगबाट नै गरिने र कासको लागि तालुक मन्त्रालयमाबाट अनुमति ल्याइसकेको निगमले जनाएको छ ।

बजारमा आफ्नो उपलब्धता बढाउन जहाज आवश्यकता रहेको भन्दै निगमले जहाजको उपलब्धता र पुनःसंरचना गर्ने विषय एक अर्कालाई रोकेर गर्नुपर्ने विषय नभएको बताएको छ ।