काठमाडौं । संयुक्त राष्ट्रसंघका महासचिव एन्टोनियो गुटेरेसले नेपाल विकासोन्मुख देशहरूका लागि एउटा शक्तिशाली आवाज भएको बताएका छन् ।

मंगलबार संसद्को दुवै सदनलाई सम्बोधन गर्दै उनले उक्त कुरा बताएका हुन् ।

“नेपाल लामो समयदेखि संयुक्त राष्ट्रसंघको प्यारो सदस्य हो,” महासचिव गुटेरेसले भने, “हालै अतिकम विकसित राष्ट्र समूहको अध्यक्ष बनेर विकासोन्मुख देशहरूका लागि नेपाल शक्तिशाली आवाज भएको छ ।”

नेपालको चार दिने भ्रमणको लागि आइतबार काठमाडौं आइपुगेका उनले नेपाल र संयुक्त राष्ट्रसंघ पुरानो मित्र भएको बताए ।

“संयुक्त राष्ट्रसंघ र नेपाल पुरानो मित्र हुन् । हाम्रो सहकार्य गहिरो छ,” उनले भने ।