काठमाडौं । उपप्रधान एवं गृहमन्त्री नारायणकाजी श्रेष्ठले धार्मिक र सामाजिक सद्भाव खल्बलाउने क्रियाकलापविरुद्ध गम्भीर रूपमा लाग्न नेपाल प्रहरीलाई निर्देशन दिएका छन् ।

सोमबार काठमाडौंमा आयोजित एक कार्यक्रममा उनले केही जिल्लाहरूमा देखिएको धार्मिक र सामाजिक सद्भाव खल्बलाउने घटनालाई संवदेनशील रूपमा लिनुपर्ने उल्लेख गरे । यस्ता क्रियाकलापविरुद्ध गम्भीर रूपमा लाग्न उनले प्रहरीलाई निर्देशन दिए ।

यस्ता घटनाको नियन्त्रण र भविष्यमा दोहरिन नदिन सरकार र राजनीतिक पक्ष पनि गम्भीर हुनुपर्नेमा उनले जोड दिए ।

उनले अपराधका नयाँ प्रकृतिलाई निस्तेज पार्न र गहन रूपमा अनुसन्धान गर्न प्रहरीलाई थप प्रविधिमैत्री बनाउँदै अघि बढाउनुपर्ने बताए । प्रहरीलाई आवश्यक स्रोतसाधन उपलब्ध गराउन सरकार प्रतिबद्ध रहेको उनको भनाइ छ ।

प्रहरीको आवश्यक भूमिका र कतव्र्यबोधले मात्र मुलुकको समृद्धि, सुशासन र कानुनी राज्यको प्रत्याभूत हुने भएकाले यसतर्फ गम्भीर हुन पनि उनले निर्देशन दिए ।

नेपाल प्रहरीका महानिरीक्षक वसन्त कुँवरले पारदर्शी, जवाफदेही, मानवअधिकारको संरक्षणलगायत विषयमा संगठनको काम–कारबाही उत्कृष्ट हुने प्रतिबद्धता जनाए । नेपाल प्रहरी कार्ययोजना, २०८० तर्जुमा गरिएको उनले जानकारी गराए ।