काठमाडौं । नेकपा (माओवादी केन्द्र)का सांसद हितबहादुर तामाङले चाडपर्वको बेलामा हुने सडक दुर्घटना रोक्न प्रभावकारी रुपमा सडक सुरक्षाको व्यवस्था गर्न सरकारको ध्यानाकर्षण गराएका छन् ।

प्रतिनिधिसभाको आइतबारको बैठकमा बोल्दै सांसद तामाङले नजिकिँदै गरेको चाडपर्वहरु दसैँ र तिहारमा गाउँ आवतजावत गर्दा दुर्घटना हुने गरेको भन्दै सडक सुरक्षाको लागि सरकारको ध्यानाकर्षण गराए ।

यात्रुहरुले सवारीसाधनको अभाव, महँगीको समस्या र टिकट उपलब्धताको समेत समस्या भोग्नुपरेको र यसमा ध्यान दिन भन्दै उनले काठमाडौं उपत्यकामा हुने चोरी र लुटपाटको पनि नियन्त्रण गर्न सरकारलाई अनुरोध गरे ।

“यात्रुहरुमाथि अनावश्यक दुःख दिने, लुटपाट गर्ने र काठमाडौं उपत्यकालगायतका सहरहरुमा मान्छेहरु कमी हुँदै जान्छन्, त्यसबीचमा चोरी बढ्ने, लुटपाटका घटना हुने गर्छन् । त्यस खालका कामहरुलाई रोक्नको निमित्त म गृहमन्त्रीको विशेष ध्यानाकर्षण गराउन चाहन्छु,” उनले भने ।

सामाजिक सद्भाव, धार्मिक सहिष्णुता भड्काउने गतिविधिहरुलाई बेलैमा नियन्त्रण गर्नुपर्ने भन्दै उनले यसका लागि संसद्मा रहेका सबै राजनीतिक दलको तर्फबाट संयुक्त रुपमा पहल गर्नुपर्ने बताए ।