काठमाडौं । इजरायलस्थित नेपाली राजदूतावासले आफ्नो सुरक्षाको ख्याल राख्न नेपाली समुदायमा आग्रह गरेको छ । इजरायलको गाजापट्टीलगायत क्षेत्रमा हाल द्वन्द्व चलिरहेको दूतावासले जनाएको छ ।

“यस्तो अशान्त वातावरणमा आफ्नो सुरक्षाको ख्याल राख्नुहुन र स्थानीय सुरक्षा निकायको निर्देशन अक्षरशः पालना गर्नुहुन सबै नेपाली समुदायमा अनुरोध छ,” दूतावासद्वारा शनिबार जारी अपिलमा उल्लेख छ ।

अप्ठ्यारो परेका नेपाली नागरिकको सहयोग र उद्धारका लागि दूतावासले इजरायलका अधिकारीहरूसँग निरन्तर समन्वय गरिरहेको अपिलमा जनाइएको छ ।

“पुनश्चः अप्ठ्यारो परिस्थिति छ, हामी सबै त्रसित छौँ । तर पनि यसको नकारात्मक सन्देश जाने गरी सोसल मिडियाहरूमा सेयर गरेर अरूलाई त्रसित र प्यानिक नगराउनु होला,” अपिलमा भनिएको छ ।

इजरायलमा रहेका नेपालीले सम्पर्क गर्न सक्ने गरी दूतावासले नम्बर पनि उपलब्ध गराएको छ । दूतावासका प्रथम सचिव अर्जुन घिमिरेलाई ०५२८२८९३०० र सहचारी सञ्जयकुमार साहलाई ०५४–५५८२०७७ मा सम्पर्क गर्न सकिने जनाइएको छ ।

प्यालेस्टाइनको सुन्नी–इस्लामिक कट्टरपन्थी संगठन हमासले शनिबार मध्य र दक्षिण इजरायलमा रकेट आक्रमण गरेपछि स्थिति अशान्त छ ।