काठमाडौं । नेकपा (एमाले)को सुदूरपश्चिम प्रदेशको अध्यक्षमा वचन सिंहले उमेदवारी घोषणा गरेका छन् । उनले बिहीबार धनगढीमा पत्रकारसँग कुरा गर्दै आफू अध्यक्षको दाबेदार रहेको बताए ।

उनले आफूले पार्टी अध्यक्ष केपी शर्मा ओली, महासचिव शंकर पोखरेल र प्रदेश इन्चार्ज छविलाल विश्वकर्मासँग छलफल गरेर नै उमेदवारी घोषणा गरेको सुनाए ।

“पार्टीका अध्यक्ष, महासचिव, प्रदेश इन्चार्जसहित सबैसँग छलफल गरेर मैले उमेदवारी घोषणा गरेको हुँ,” उनले बाह्रखरीसँग भने ।

उनले आफू पार्टी एकताबद्ध बनाउने कुरामा सहमतिको बाधक नरहेको बताए ।

“म सर्वसहमतिको पक्षमा हो । पार्टीलाई एकताबद्ध बनाउने कुरामा सहमतिको बाधक बन्दिन । मभन्दा बाहेक अध्यक्षको आकांक्षी बन्नुभएका नेताहरू मभन्दा अग्रज हुनुहुन्छ । उहाँहरूको पार्टीमा व्यवस्थापन हुनुपर्छ,” उनी भन्छन्, “प्रदेश अध्यक्षको जिम्मा मलाई दिँदा मैले आगामी प्रदेश र संघको निर्वाचनमा एमालेले एकल सरकार बनाउने अभियानमा हिँड्छु ।”

सुदूरपश्चिम प्रदेशको अधिवेशन असोज २१ र २२ गते हुँदै छ ।