काठमाडौं । सत्तासाझेदार दल जनता समाजवादी पार्टी (जसपा)का प्रमुख सचेतक प्रदीप यादवले पूर्वराजा ज्ञानेन्द्र शाहको ‘लोकतन्त्रविरोधी गतिविधि’को निगरानी बढाउनुपर्ने बताएका छन् ।

बिहीबार प्रतिनिधिसभा बैठकमा उनले अहिले धर्मका नाममा भइरहेको विवाद देखेर राजावादी हुँ भन्नेहरू हौसिएको बताए । ठूलो संघर्ष र बलिदानले संघीय लोकतान्त्रिक गणतन्त्र स्थापित भएको भन्दै उनले यसलाई मास्ने दुष्प्रयास कसैले नगर्न चेतावनी दिए ।

“अहिले राजावादी भन्नेहरू हौसिएका छन्, किन ? कतै आगो लगाएर न्यानो ताप्ने योजना त छैन यिनीहरूको ? जनतामा गहिरो आशंका छ,” उनले भने, “पूर्वराजा ज्ञानेन्द्र शाहको लोकतन्त्रविरोधी गतिविधिको निगरानी गर्नुपर्छ । अहिलेको व्यवस्था निकै ठूलो संघर्ष र बलिदानले आएको हो । यसलाई मास्ने दिवास्वप्न कसैले नदेखे हुन्छ ।”

पछिल्लो समय धार्मिक र साम्प्रदायिक द्वन्द्व फैलाएर मधेसको एकता भाँड्ने दुष्प्रयास भइरहेको भन्दै उनले आक्रोश पोखे ।

“मधेसी जहिले पनि संघीयता र गणतन्त्रका लागि लडेको हो । त्यसैले षड्यन्त्रको तहत मधेसकमा धार्मिक तनाव गराउने खेल हुँदै छ । मधेसको राजनीतिकको तागत भनेको हिन्दु र मुस्लिमको साझा एकता हो,” उनले भने, “अहिले एकता तोड्ने काम तीव्र गतिमा भएको छ । यो राम्रो हैन । विभाजन र ध्रुवीकरणले राष्ट्रिय सुरक्षा जटिल बन्दै गएको छ ।”

उनले सामाजिक सञ्जालले पनि द्वन्द्वमा घिउ थप्ने काम गरिरहेको टिप्पणी गरे । सांसद यादवले सामाजिक सद्भाव भाँड्न खोज्ने जोकोहीलाई कारबाही गर्न माग गरे ।

टिकटक, फेसबुकलगायत सामाजिक सञ्जालमा पुराना त्यस्ता भिडियो राख्ने र ‘भाइरल’ बनाउने व्यक्तिहरूलाई पनि खोजीखोजी कारबाहीको दायरामा ल्याउनुपर्नेमा उनले जोड दिए ।

“यो नेपाली समाजको तागत हो । द्वन्द्व चर्काउने, हिंसा भड्काउने र उक्साउने, सामाजिक सद्भाव भड्काउने अभिव्यक्ति दिने महन्त र मोहलीलाई कारबाही गर्नुपर्छ,” उनले भने, “सामाजिक सञ्जालमा उत्तेजक सामग्री राख्ने, पुरानो भिडियो काँटछाँट गरेर हिंसा भड्काउनेलाई तुरुन्तै कारबाहीको दायरामा ल्याउने र तुरुन्तै बन्द गर्नुपर्छ । समाज जोगाउने दायित्व हामी सबैको हो । लोकतन्त्र र सामाजिक सद्भावको जित हुन्छ ।”

अहिलेको अवस्थामा सबै सांसद र राजनीतिज्ञ मधेसका सबै जिल्लामा एकपटक स्थगलत भ्रमणमा जानुपर्ने उनले बताए ।