![काेसी प्रदेशसभामा एमालेबाहेकले संसदीय दललाई पूर्णता दिएनन्, माओवादीमा दलका नेतामात्र चयन](https://12khari.top/uploads/posts/NC-Sansadiya-Dal-Meeting-1695801473.jpg)
विराटनगर । काेसी प्रदेशसभामा नेपाल कम्युनिष्ट पार्टी (एमाले) बाहेकले संसदीय दलकाे कार्यसमितिलाई अझै पूर्णता दिएका छैनन् । प्रदेशसभा सञ्चालन नियमावलीको परिच्छेद २३ मा दलको कार्यालय र त्यससम्बन्धी व्यवस्था छ । यसअनुरुप दलले आफ्नो सदस्यहरूको विवरण सभालाई उपलब्ध गराउनु पर्छ । दललाई आफ्नो छुट्टै विधानसमेत निर्माण गर्ने अधिकार छ ।
हाल कोसी प्रदेशसभामा ६ वटा दल छन् । तीमध्ये एमालेले संसदीय दलको नेता, उपनेता, प्रमुख सचेतक र सचेतकसमेत चयन गरी कार्यसमितिलाई पूर्णता दिएको छ । सभामा सबैभन्दा ठूलो दल एमाले संसदीय दलको नेता हिक्मत कार्की छन् । अहिले उनले प्रदेश सरकारको नेतृत्व गरिरहेका छन् । एमाले उपनेता रामबहादुर मगर, प्रमुख सचेतक रेवतिरमण भण्डारी र सचेतक कमला दर्नाल छिन् । दर्नाललाई संसदीय दलले आइतबार सचेतक नियुक्त गरेको हो ।
यसअघि सो जिम्मेवारीमा रहेकी सिर्जना राई प्रदेशको सामाजिक विकास राज्यमन्त्री नियुक्त भएकी छन् । राईको स्थानमा एमालेले तेह्रथुमकी सांसद दर्नाललाई सचेतक नियुक्त गरेको हो । प्रमुख सचेतक भण्डारीले भने, “हामीले सबैभन्दा पहिले पदाधिकारी चयनदेखि दललाई पूर्णता दिने काम गरेका हौं ।” कोसी प्रदेशसभामा (सभामुखसहित) एमालेका ४० सांसद छन् ।
सभामा दोस्रो ठूलो दल नेपाली कांग्रेसका २९ सांसद छन् । कांग्रेसले भने संसदीय दललाई पूर्णता दिइसकेको छैन । संसदीय दलको नेता उद्धव थापा, उपनेता हिमाल कार्की र प्रमुख सचेतक भुपेन्द्र राई छन् । कांग्रेसले सचेतक भने चयन गर्न बाँकी छ । प्रमुख सचेतक राईले चाँडै नै पूर्णता दिने तयारी रहेको सुनाए ।
तेस्रो ठूलो दल नेपाल कम्युनिष्ट पार्टी (माओवादी केन्द्र)ले दलको नेताबाहेक अरु पदाधिकारी चयन गरेको छैन । माओवादी केन्द्रको संसदीय दलको नेतामा इन्द्रबहादुर आङ्बो छन् । माओवादी सांसद दुर्गाप्रसाद चापागाईंले आफ्नो पार्टीले दलमा पदाधिकारी चयन गर्न बाँकी रहेको बताउँदै भने, “अहिले सबै निर्णय र दलको प्रतिनिधित्व दलका नेताले नै गर्दै आउनु भएको छ । हामीले दललाई पूर्णता दिन आग्रह गरिरहेका छौं ।”
राष्ट्रिय प्रजातन्त्र पार्टी (राप्रपा)ले दलको नेता र प्रमुख सचेतक चयन गरेको छ । उपेनता र सचेतक चयन गर्न बाँकी छ । राप्रपा सांसद सविना बजगाईंले भनिन्, “बाँकी पदाधिकारी चयन गर्ने विषयमा दलको बैठकमा पनि छलफल अघि बढेको छैन ।” प्रदेशसभामा राप्रपाका ६ सांसद छन् । दलको नेता भक्तिप्रसाद सिटौला र प्रमुख सचेतक अमरबहादुर विष्ट छन् ।
नेपाल कम्युनिष्ट पार्टी (एकीकृत समाजवादी)ले दलको नेताको जिम्मेवारीमा राजेन्द्र राई छन् । सभामा ४ सांसद रहेको समाजवादीले पदाधिकारी चयन गर्नेबारे थप केही छलफल नगरेको सांसद विद्या चाम्लिङले बताइन् ।
कोसी प्रदेशसभामा एक जनामात्र सांसद रहेको जनता समाजवादी पार्टी (जसपा)मा निर्मला तावा लिम्बू दलको नेता छिन् । कोसी प्रदेशसभा ९३ सदस्यीय छ । सभामुख बाबुराम गौतमले आफ्नो पदबाट राजीनामा दिएपछि सभामुख चयन गर्न बाँकी छ ।