काठमाडौं । ३८ दिनयता काठमाडौंको माइतीघरमा रिले अनशन बसिरहेका चिकित्सा शिक्षा सरोकार संघर्ष समितिका पदाधिकारीको अनशन तोडिएको छ ।

स्वास्थ्यमन्त्री मोहन बस्नेतले माग सम्बोधन गर्न सरकारले पहल गरिरहेको र चिकित्सा शिक्षा ऐन छिट्टै संशोधन हुने तयारीमा रहेको आश्वासन दिएपछि सोमबार उनीहरूले अनशन तोडेका हुन् । १४ बुँदे मागसहित उनीहरू अनशनरत थिए ।

अनशन तोडाउन स्वास्थ्यमन्त्रीले स्वकीयसचिव रामेश्वर आयार्च र रामचन्द्र दुलाललाई माइतीघर पठाएका थिए । मन्त्री बस्नेतका प्रतिनिधि आचार्यले संघर्ष समितिका सदस्यलाई जुस पिलाएर अनशन स्थगित गराए ।

अनशन तोडेपछि संघर्ष समितिका पाँच पदाधिकारी वार्ता गर्न स्वास्थ्य तथा जनसंख्या मन्त्रालयमा पुगेका थिए । मन्त्री बस्नेतसहितको वार्तामा स्वास्थ्यसचिव डा. रोशन पोखरेल, अतिरिक्त सचिव डा. विकास देवकोटा, डा. टंक वाराकोटीलगायत अधिकारी उपस्थित थिए ।

वार्तामा संघर्ष समितिका संयोजक सापकोटाले मागका विषयमा मन्त्री बस्नेतलाई जानकारी गराए । उनले माग सम्बोधन हुनुपर्नेमा जोड दिए ।

स्वास्थ्यमन्त्री बस्नेतले चिकित्सा शिक्षा ऐन संशोधन गरेर अगाडि बढ्न सरकार तयार रहेको उल्लेख गरे । यस विषयमा शिक्षामन्त्री र प्रधानमन्त्री समेत सकारात्मक रहेको भन्दै उनले संघर्ष समितिका माग चाँडै सम्बोधन हुने आश्वासन दिए ।

उनले चिकित्सा शिक्षा ऐन संशोधन गर्न नसकिए अबका पाँच वर्षभित्र नेपालमा चिकित्सक र नर्सको अभाव हुने बताए । प्रधानमन्त्री विदेश भ्रमणबाट फर्किएपछि यसबारेमा ठोस पहल हुने उनको भनाइ छ ।

चिकित्सा शिक्षा ऐन संशोधन, सीटीईभीटीको पुनर्संरचना गर्नुपर्नेलगायत माग संघर्ष समितिले अघि सारेको छ ।