काठमाडौं । नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले प्रधानमन्त्री पुष्पकमल दाहाल प्रचण्ड र नेकपा (एकीकृत समाजवादी)का अध्यक्ष माधवकुमार नेपालले साम्प्रदायिक हिंसा भड्काउन खोजेको आरोप लगाएका छन् ।

बिहीबार भक्तपुरमा नेपाल भूतपूर्व सैनिक तथा प्रहरी संगठनको कार्यक्रमलाई सम्बोधन गर्दै ओलीले कोसी प्रदेशमा प्रचण्ड र नेपालले जनजातिहरु भिडाएर साम्प्रदायिक हिंसा भड्काउन खोजेको आरोप लगाए । 

कोसी प्रदेशमा आन्दोलन गर्नेहरुमा प्रधानमन्त्री र अध्यक्ष नेपालका कार्यकर्ताहरु रहेको उनले उल्लेख गरे । द्वन्द्व भड्काउनका लागि प्रचण्ड र नेपालले कार्यकर्ताहरु भिडाउने काम गरेको भन्दै ओलीले एमालेले द्वन्द्व मच्चिन नदिने बताए ।

“अहिले पूर्वाञ्चलमा उत्पात मच्चाउने कसका कार्यकर्ता छन् भन्दा माओवादी प्रचण्डजीका कार्यकर्ता छन्, माधवकुमार नेपालजीका कार्यकर्ता छन् । उफ्रेका को छन् भन्दा राई, किराँत, लिम्बू भन्ने साथीहरु उफ्रिएका छन् । उफार्ने को छ भन्दा पुष्पकमल दाहाल, माधवकुमार नेपाल,” उनले भने, “यी बाहुनले, नुवकोटमा हुन्छ एउटा खेल– साढे जुधाउने भन्ने । ती साढेको केही दुश्मनी नै छैन । भेटेको पनि होइन, कहिल्यै । आफ्नो आफ्नो थलोबाट ल्याएर अखडामा भिडाउँछन् । अरु छेउमा बसेर ताली बजाउँछन् । प्रचण्ड र माधव नेपालहरु त्यसै गरेर नेपाली जनतालाई नुवाकोटको गोरु जुधाएजस्तो जुधाएर ताली बजाउन खोजिरहेका छन् ।”

अध्यक्ष ओलीले सरकारले ट्याक्सीमा भएका अभियुक्तलाई भगाएर सुन तस्करीमा आफै संलग्न रहेको प्रमाणित गरेको बताए । सुन नियन्त्रणमा लिने क्रममा सँगै ट्याक्सीमा रहेका हर्कबहादुर राईलाई बोलाएको बेला हाजिर हुनु भनेर सुन जम्मा पारिएको स्थानबाट अन्य व्यक्तिहरुलाई भगाउन सरकार लागेको उनले बताए ।

“एक क्विन्टल सुन तस्कर परेको थियो, ट्याक्सीमा । एयरपोर्टमा होइन बाहिर । ल्याउने, लाने गरेको ड्राइभर साथैमा छ । मेरो सामान भनेर बुझ्न जाने हर्कबहादुर राई त्यही ट्याक्सीमा छ,” उनले भने, “राजस्व अनुसन्धान विभागमा पु¥याएर एक क्विन्टल सुनसहित पक्राउ परेका अभियुक्तहरु लगेर फेरि खोजीका बखत हाजिर हुन्छु भनेर छोडे । किन छोड्यो, के भनेर छोड्यो, छिटो जाउ, सबलाई खबर गर, सामान लुकाउ, मान्छे भगाउ, तीन दिनपछि फेरि समात्छौँ । त्यसरी दुईजनालाई पठाए । अनुसन्धानले त्यसरी छोड्छ ? अनुसन्धान भनेको त्यस्तै हुन्छ ?”

सुन तस्करी प्रकरणलाई लुकाउन गिरीबन्धु टी स्टेटमा आफ्नो संलग्नता हुँदै नभएको कुरालाई झिकेर जनतामा भ्रम छर्ने काम भइरहेको ओलीले बताए ।

“सय केजी ६१ मा झरेको छ । यति मजाक गरिरहन, भ्रष्टाचारको यसकुरालाई लुकाउन गिरीबन्धु टी स्टेट खायो केपीले भने । छ झापामा गिरिबन्धुको हो, मेरो होइन, मैले के गर्नु त छ भने ।”