विराटनगर । विराटनगर महानगरपालिकाको न्यायिक समितिमा दर्ता भएका २३७ मध्ये २०९ मुद्दा फछर्यौट भएका छन् । 

न्यायिक समितिकी संयोजक तथा उपमेयर शिल्पा निराला कार्कीका अनुसार दर्ता भएका उजुरीमध्ये ८८ प्रतिशत भन्दा धेरै फछर्यौट भएका छन् । गत आर्थिक वर्ष सबैभन्दा बढी वडा नम्बर १२ बाट २१ उजुरी दर्ता भएका थिए ।

न्यायिक समितिको तथ्यांकअनुसार साँध सीमानासम्बन्धी ५५, महिला तथा घरेलु हिंसासम्बन्धी २९, श्रीमान्–श्रीमती विवादसम्बन्धी २९ उजुरी परेका थिए । 

समितिका खान, लगाउन नदिएको, कुटपिट, दाइजो, लेनदेनसम्बन्धी पनि उजुरी पर्ने गरेको कार्कीले बताइन् । 

अघिल्लो आर्थिक वर्षमा दर्ता भएका उजुरीमध्ये २८ वटा मात्रै फछर्यौट हुन बाँकी छ । दर्ता भएका मध्ये समितिले ३९ वटा जिल्ला अदालत मोरङमा पठाएको छ । ४४ वटा मिलापत्र भएको छ । 

अघिल्लो आर्थिक वर्ष २०७८/०७९ मा २१० वटा उजुरी दर्ता भएका थिए । तीमध्ये १७५ वटा उजुरीको निर्णय भएको उपमेयर कार्कीले बताइन् ।