काठमाडौं । नेपाली कांग्रेसका केन्द्रीय सदस्य गुरु बरालले ०७४ को निर्वाचनको तुलना गर्दा आठ लाख भोट हराएको बताएका छन् । 

जारी केन्द्रीय कमिटी बैठकमा बुधबार उनले भोट कहाँ खोज्ने भन्दै प्रश्न गरे । “स्थानीय चुनावबाट ७–८ लाख भोट हराएको छ । यो भोट कहाँ खोज्ने हो ? यो आँकडामा कांग्रेस ठुलो भएको छ । कांग्रेस कहाँ कमजोर भयो ? कांग्रेसभित्रै कमजोर भयो,” उनले भने । 

उनले चुनावमा आफूले पार्टी एक्लै लड्नुपर्ने धारण राखेको पनि स्मरण गरे । उनले तेल र पानीजस्तो गठबन्धन भएकाले परिणाम कमजोर आएको बताए । त्यही कारण मत घटेको उनको भनाइ छ । 

“कांग्रेस एक्लै लड्नुपर्छ भन्ने धारणा राखेको थिएँ ।  अब फेरि गठबन्धन गर्ने त ? सैद्धान्तिक रूपमा हामी फरक धरातलमा थियौँ । र, हामीहरूको गठबन्धन सफल हुन सकेन,” उनले भने, “ ०७४ को निर्वाचनमा एमाले र माओवादीको गठबन्धन दुध र पानीजस्तो थियो ।  अहिलेको हाम्रो गठबन्धन तेल र पानी मिलेजस्तो थियो । त्यसो भएर पूर्णरूपमा सफल हुन सकेन ।” 

उनले पार्टी उपसभापति र महामन्त्रीलाई आफ्ना गतिविधि जिम्मेवार भएर गर्न आग्रह गरे । “महामन्त्रीजी यहाँ हुनुहुन्छ । मैले एफएममा सुनेँ सुर्खेतमा महामन्त्रीजीले राष्ट्रपति बाँड्दिनुभो । प्रधानमन्त्री बाँड्दिनुभो । कांग्रेसको कार्यबाहक सभापति बाँड्दिनुभयो । कांग्रेसको ओजिलो महामन्त्रीले पद बाँड्दिनुभयो, काठमाडौं आउँदा केही पनि भएन,” बरालले भने, “उपसभापतिजीले रेशम चौधरीका बारेमा ट्विट गर्नुभो । ट्विट गर्दा उपसभापति र सांसद हुनुहुन्थ्यो । निर्णय गर्ने ठाउँमा मन्त्री हुनुभयो । तपाईंहरूले जिम्मेवार बोध गरेर गतिविधि गर्नुस् ।”

ठुला नेताले बोल्ने कुरामा ध्यान नदिँदा आम कार्यकर्तामा 'जे बोले पनि हुने रहेछ, जे गरे नि हुने रहेछ' भन्ने भावना मौलाएको उनको भनाइ छ । 

उनले बैठकमा आफूले राखेको धारणा लाइभ नगर्न आग्रह गरेका थिए ।