काठमाडौं । चिनियाँ विदेशमन्त्री छिन काङ करिब तीन साताभन्दा बढी समयदेखि सार्वजनिक रूपमा नदेखिएको अन्तर्राष्ट्रिय सञ्चारमाध्यमले जनाएका छन् ।

संयुक्त राज्य अमेरिकाका लागि पूर्वराजदूत समेत रहेका काङ चिनियाँ राष्ट्रपति सी चिनफिङका निकट नेता मानिन्छन् । पछिल्ला दिनमा अमेरिकी अधिकारीको उच्चस्तरीय भ्रमणमा महत्त्वपूर्ण भूमिका खेल्दै सम्बन्ध सुधार गर्नेतर्फ उनले काम गर्ने ठानिएको थियो ।

गएको जुन २५ मा श्रीलंकाली समकक्षीसँग बेइजिङमा भेट गरेयता उनी सार्वजनिक रूपमा नदेखिएको दी गार्डियनले उल्लेख गरेको छ ।

जुलाइ ९ मा अमेरिकी अर्थमन्त्री जेनेट येलेनको चारदिने बेइजिङ भ्रमणका क्रममा भएको भेटवार्तामा समेत काङ सामेल थिएनन् ।

गएको अगस्टमा तत्कालीन अमेरिकी सभामुख न्यान्सी पेलोसीले ताइवानको भ्रमण गरेपछि दुई देशबीचका सबै उच्चस्तरीय कार्यक्रम एक वर्षका लागि स्थगित गरिएको थियो । जुलाईको सुरुमा चिनियाँ अधिकारीले कुनै कारण नदिई ईयूका विदेश नीति प्रमुख जोसेप बोरेलको भ्रमण रद्द गरेका थिए ।

गएको साता इन्डोनेसियामा आयोजित आसियान शिखर सम्मेलनमा बेइजिङको प्रतिनिधिमण्डलको प्रमुखबाट काङको नाम हटाइएको थियो । चीनको विदेश मन्त्रालयका प्रवक्ता वाङ वेनबिनले स्वास्थ्यका कारण काङ नजाने भनेका थिए । तर, उनले थप विवरण उल्लेख गरेका थिएनन् ।

पछिल्ला वर्षहरूमा चिनियाँ कूटनीतिमा नयाँ ‘आक्रामक’ शैली ल्याउने ‘वल्फ वरियर’का रूपमा काङले चर्चा पाएका थिए ।

५७ वर्षीय काङ अहिले कहाँ छन् भन्ने कुनै जानकारी सार्वजनिक भएको छैन । उनी यसरी हराउनुको नतिजा कुन किसिमको हुन्छ भन्नेमा विभिन्न टीकाटिप्पणी गरिन थालेको छ । तर, सन् २०१२ मा राष्ट्रपति हुनुअघि सी पनि करिब दुई हप्ता सार्वजनिक रूपमा देखिएका थिएनन् ।