काठमाडौं । आर्थिक वर्ष २०७९/८० मा काठमाडौंमा अपराधका घटनाहरु बढेका छन् । जिल्ला प्रहरी परिसर काठमाडौंले सोमबार पत्रकार सम्मेलन गर्दै आर्थिक वर्ष २०७८/७९ को तुलनामा २०७९/८० मा काठमाडौंमा अपराधका घटनाहरु बढेको जनाएको हो ।

२०७८/७९ मा आठ हजार ९७७ मुद्दा दर्ता भएकोमा आर्थिक वर्ष २०७९/८० मा मुद्दा दर्ताको संख्या १३ हजार ४६४ पुगेको जिल्ला प्रहरी परिसर काठमाडौंका प्रमुख प्रहरी वरिष्ठ उपरीक्षक दानबहादुर कार्कीले जानकारी दिए ।

परिसरका अनुसार सबैभन्दा बढी बैंकिङ कसुरसम्बन्धी सात हजार १०१ मुद्दा दर्ता भएका छन् भने अभद्र व्यहारका दुई हजार ८९४ मुद्दा दर्ता भएकोे कार्कीले बताए । त्यस्तै, आर्थिक वर्ष २०७९/८० मा प्राप्त दुई हजार १६२ उजुरीमध्ये ६४१ को मात्रै फछ्र्यौट भएको छ ।

कार्कीले अनलाइन प्रविधिबाट देखा परेका आर्थिक अपराधहरु पनि पछिल्लो समय बढ्दै गएको बताए । काठमाडौं जिल्लामा देखिएका अपराधका चुनौतीहरुलाई सामना गर्न दक्ष र प्रविधियुक्त जनशक्ति विस्तार गरी अनुसन्धानलाई प्रभावकारी बनाउने उनले बताए । 

कार्कीले नाकामा प्रवधियुक्त प्रणाली जडान गरी अपरान्ध नियन्त्रणतर्फ ध्यान दिने बताए ।

त्यस्तै, साइबर अपराध र अनलाइन ठगीका घटनाहरु हुन नदिन समुदाय प्रहरी साझेदारी कार्यक्रममार्फत लक्षित वर्गमा जनचेतना प्रदान गरिने, प्रभावकारी तवरले प्रहरी परिचालन गरी शान्त र सुरक्षित काठमाडौं निर्माणको अवधारणालाई मुर्तरुप प्रदान गर्ने कार्कीले बताए ।