काठमाडौं । ब्राजिलको सर्वोच्च निर्वाचन अदालतले पूर्वराष्ट्रपति जायर बोल्सोनारोलाई आठ वर्षसम्म राष्ट्रको सर्वोच्च पदमा उमेदवार हुनबाट रोक लगाएको छ । अदालतले रोक लगाउने क्रममा न्यायाधीशहरुको ५–२ मतसहित निर्णय दिएको छ ।

बोल्सोनारोलाई गत वर्षको राष्ट्रपति चुनावअघि आफ्नो शक्तिको दुरुपयोग गरेको आरोपमा दोषी ठहर गरिएको थियो । प्रयोग गरिएको विद्युतीय मतपत्र ह्याकिङ र जालसाजीको जोखिममा रहेको दाबी गरेर ब्राजिलको लोकतन्त्रलाई कमजोर बनाएको आरोप उनीमाथि लगाइएको थियो ।

बोल्सोनारोका वकिलहरूले फैसलाविरुद्ध अपिल गर्ने अपेक्षा गरिएको छ । उनले आफ्नो भनाइले चुनावी नतिजामा कुनै असर नपर्ने तर्क गरेका बीबीसीले लेखेको छ ।

यो प्रतिबन्ध २ अक्टोबर २०२२ देखि हो, जतिबेला राष्ट्रपति चुनाव भएको थियो ।

यो निर्णय कायम रह्यो भने बोल्सोनारो २०२६ मा अर्को राष्ट्रपति चुनावमा भाग लिन योग्य हुने छैनन् । तर, २०३० मा पुनः चुनावमा भाग लिन सक्षम हुनेछन् ।

उनलाई २०२४ र २०२८ मा हुने नगरपालिकाको निर्वाचनमा समेत प्रतिबन्ध लगाइनेछ ।

बोल्सोनारोले अदालतको निर्णयलाई ‘पिठमा छुरा हानिएको’ रूपमा वर्णन गरे । र, ब्राजिलमा दक्षिणपन्थी राजनीतिलाई अगाडि बढाउन काम जारी राख्ने बताए ।

पूर्वराष्ट्रपतिविरुद्धको उक्त मुद्दा उनले २०२२ मा राष्ट्रपति हुँदा गरेको भाषणको वरिपरि घुम्छ । जुलाई १८ मा उनले विदेशी कूटनीतिज्ञहरूलाई राजधानी ब्रासिलियामा आफ्नो निवासमा आमन्त्रित गरे, जहाँ उनले ब्राजिलमा प्रयोग हुने इलेक्ट्रोनिक भोटिङ मेसिनहरू ह्याकिङ र व्यापक जालसाजीका लागि खुला रहेको दाबी गरे ।

बोल्सोनारोलाई उनका कट्टर प्रतिद्वन्द्वी, वामपन्थी लुइज इनासियो लुला दा सिल्भाले शीर्ष पदको लागि चुनौती दिए । चर्को प्रतिस्पर्धा भएको निर्वाचन अक्टोबर ३० मा सकियो र लुलाले थोरै मतान्तरले जित हासिल गरे ।

बोल्सोनारोले कहिल्यै सार्वजनिक रूपमा आफ्नो हार स्वीकार गरेनन् । उनी लुलाले राष्ट्रपतिको रूपमा शपथ लिनुभन्दा दुई दिन अघि ब्राजिलबाट फ्लोरिडा प्रस्थान गरे ।