काठमाडौं । राष्ट्रिय योजना आयोगका उपाध्यक्ष मीनबहादुर श्रेष्ठले सबै योजना फेल नभएको बताएका छन् । मंगलबार १६औँ योजना (२०८२/०८२–२०८५/०८६) तर्जुमा तयारीको क्रममा सञ्चारकर्मीसँग छलफल गर्दै उनले धेरैजसो योजना फेल भएको भए पनि सबै योजना फेल भएको भन्न नमल्निे दाबी गरे ।

“हामीले बनाएको सबै योजना फेल भएका होइनन् । धेरैजसो योजना फेल भए । एकदेखि १३औँ योजनासम्म राखेको लक्ष्य र लक्ष्य प्राप्तिमा ग्याप बढी थियो,” उनले भने, “तर, १४औँ योजनामा त्यस्तो थिएन । १४औँ योजना भनेको यस्तो योजना हो, जसले राखेको लक्ष्यभन्दा बढी आर्थिक वृद्धि गरेका थियौँ ।”

कोभिड–१९, रूस र युक्रेनको युद्धको कारणले १५औँ योजनाको लक्ष्य पूरा हुन कठिन भएको उनले बताए । १६औँ योजना निर्माण गर्दा संरचनात्मक सुधार गरेर काम गर्ने समेत उनले बताए ।

“हामीले रातारात परिवर्तन गर्न सक्ने अवस्था छैन । कार्यविधिमा, कार्यप्रणालीमा समस्या छ,” उनले भने, “सरकारी क्षेत्रमात्र नभएर निजी क्षेत्र, निर्माण व्यवसायीहरूमा, उपभोक्ताहरूलगायत धेरै क्षेत्रमा समस्या रहेको छ ।”

अहिले योजनाको लक्ष्य पूरा नहुनुको कारण र समस्याको पहिचान गरेको श्रेष्ठले बताए । उनले १६औँ योजनामा अहिले पहिचान भएका समस्या समाधान गर्नको लागि नतिजा देखिने गरेर काम कसरी गर्ने भन्ने रणनीतिक खाका तयार पारेर काम गर्ने बताए ।

प्राकृतिक स्रोत साधनको अधिकतम प्रयोग गर्ने, डिजिटल डेटाबेस र ई–गभरमेन्टमा फड्को मार्न १६औँ योजना निर्माण गर्ने बताए ।