काठमाडौं । प्रतिनिधिसभाअन्तर्गतको अर्थ समितिले ब्रोकर लाइसेन्स वितरण प्रक्रिया रोक्न नेपाल धितोपत्र बोर्डलाई पत्र पठाएको छ । समितिले ब्रोकर लाइसेन्ससम्बन्धी कार्यलाई अगाडि नबढाउन सोमबार बोर्डलाई पत्र पठाएको बोर्ड स्रोतले बताएको छ ।

संघीय संसद् सचिवालय सिंहदरबारमा सोमबार बसेको समितिको बैठकमा नयाँ स्टक एक्सचेन्ज र ब्रोकर लाइसेन्सको विषयमा छलफल भएको थियो । अधिकांशले पहिलेको समितिले गरेको निर्णयलाई छानबिन गर्नुपर्ने भन्दै यसलाई रोक्नुपर्ने र बोर्डका अध्यक्षलाई बोलाएर सोधपुछ गर्नुपर्ने धारणा राखेका थिए ।

सर्वाेच्च अदालतमा मुद्दा परेको र बोर्डको पक्षमा फैसला भएकाले पुनः ४५ दिनको म्याद राखेर बोर्डले आवेदन खुला गर्नुपर्ने भन्दै विनोद तिमिल्सिनाले २०८० जेठ ७ गते समितिमा उजुरी दिएका थिए ।

फैसलापछि बोर्डले १० दिनको अवधि राखेर आवेदन खुला गरेको थियो । धितोपत्र बोर्डले नयाँ ब्रोकर लाइसेन्सका लागि १८ वटा कम्पनीलाई लाइसेन्स दिएको छ । यीमध्ये सातवटाले नेप्सेमा सदस्यताका लागि निवेदन दिएका छन् ।

समिले यो पत्र धितोपत्र बोर्डलाई पठाएसँगै लाइसेन्स प्राप्त गरेका ब्रोकरहरुले काम गर्न नपाउने भएका छन् । समितिले अध्ययन गर्ने र निष्कर्ष नआएसम्म यससम्बन्धी सम्पूर्ण काम रोक्न नेप्सेलाई बोधार्थसहित पत्रमार्फत निर्देशन दिएको छ ।

नयाँ ब्रोकर लाइसेन्सका लागि ४३ कम्पनीले आवेदन दिएका थिए ।