site stats
बाह्रखरी :: Baahrakhari
देश
Global Ime bankGlobal Ime bank
इजलासमा प्रश्न– कानुन त सबैलाई बराबर होला नि !

काठमाडौं । नक्कली भुटानी शरणार्थी प्रकरणमा आज अभियुक्तहरुको तर्फबाट थुनछेक बहसको पाँचौँ दिन हो । पाँचौँ दिनसम्म कानुन व्यवसायीले आफ्नो पक्षको प्रतिरक्षा गर्दै बहस गरेका छन् । बहसमा आफ्नो पक्षको प्रतिरक्षामा लगभग सबै कानुन व्यवसायीले उठाएको विषय हो– बयानको क्रममा पोलिएका अन्य व्यक्तिका नाम ।

नेपाली नागरिकलाई भुटानी शरणार्थी बनाएर अमेरिका पठाउने भन्दै ठगी गरेको अभियोगमा ३० जनाविरुद्ध काठमाडौं जिल्ला अदालतमा मुद्दा दायर भएको छ । पक्राउ परेका १८ अभियुक्तको तर्फबाट गत बुधबारदेखि बहस भइरहेको छ ।

गत सोमबार अभियुक्तमध्येका पूर्वगृहसचिव टेकनारायण पाण्डेका तर्फबाट रमण श्रेष्ठले बहस गरेका थिए । उनले अर्का अभियुक्त केशव दुलालको बयानकै आधारमा पाण्डेलाई पक्राउ गरी मुद्दा चलाइएको तर अन्य व्यक्तिहरुको सम्बन्धमा भने बयानमा पोले पनि कुनै कारबाही अगाडि नबढेको बताएका हुन् ।

सहअभियुक्तको बयानकै आधारमा मुद्दा चलाउनु पर्ने भए बयानमा पोलिएका अन्यलाई मुद्दा नचलाइनुको कारण के हो भन्दै श्रेष्ठले प्रश्न उठाए । उनले केशव दुलालको बयानमा केपी ओलीका स्वकीय सचिव राजेश बज्रचार्य र अजयक्रान्ति शाक्यको नाम पनि आएको बताए । उनले ‘दुलालले बयानमा उल्लेख गरेको राजेश बज्राचार्य, अजयक्रान्ति शाक्य, प्रेम राईविरुद्ध किन मुद्दा चलेन ? कानुन त सबैलाई समान होला नि ?’ भन्दै प्रश्न गरे ।

केशव दुलालले सरकारी वकिलसमक्ष दोस्रो बयानमा पाण्डेलाई पोलेका थिए । त्यस्तै, तेस्रोपटकको बयानमा रामबहादुर थापा ‘बादल’, प्रेमकुमार राई,  राजेश बज्राचार्य, अजयक्रान्ति शाक्यलाई समेतलाई पोलेका थिए । तर दुलालले तेस्रोपटकको बयानमा पोलेका व्यक्तिहरुलाई भने अनुसन्धान वा कारबाहीको दायरामा ल्याइएको छैन ।

पूर्वमहान्यायाधिवक्ता समेत रहेका श्रेष्ठले आफ्ना पक्ष पाण्डेलाई पनि पोलिएकै आधारमा मुद्दा चलाउनु नपर्ने तर्क राखेका हुन् ।

त्यस्तै, अभियुक्तमध्येका रामशरण केसीको तर्फबाट प्रस्तुत भएका वरिष्ठ अधिवक्ता बालकृष्ण न्यौपानेले भने बयानका क्रममा पोलिएका व्यक्तिहरुलाई अदालतबाट प्रतिवादी कायम गराउन माग गरेका थिए ।

केसीको तर्फबाट उपस्थित वरिष्ठ अधिवक्ता न्यौपानेले यस मुद्दाको आफै पीडित भएको जिकिर लिएका थिए । न्यौपानेले केसी आफै भुटानी शरणार्थी बनी अमेरिका जान तयार भएर रकम बुझाएको दाबी गरेका छन् । 

उनले यस प्रकरणमा बयानको क्रममा पोलिएका व्यक्तिविरुद्ध भने मुद्दा नचलाउने तर आफ्ना पक्ष, जो आफै पीडित हुन्, उनीहरुमाथि मुद्दा चलाउने प्रवृत्तिलाई कटाक्ष गरे । “मुद्दामा मुछिएका हाई–प्रोफाइललाई छाड्ने, तर साना व्यक्तिहरुलाई अनाहक मुद्दा चलाउनाले ‘जो होचो, उसकै मुखमा घोचो’ भएको छ,” न्यौपानेले भने ।

उनले इजलासबाटै प्रतिवादी कायम गर्न मिल्ने हुँदा एक महिनाभित्र पोलिएका व्यक्तिहरुलाई अभियोजन दायर गराउन माग गरेका हुन् । न्यौपानेले अभियुक्तमध्येका टेकनाथ रिजालले तत्कालीन प्रधानमन्त्री केपी शर्मा ओलीदेखि बहालवाला प्रधानमन्त्री पुष्पकमल दाहाल प्रचण्ड समेतलाई उल्लेख गरेको बताउँदै पोलिएका सबै व्यक्तिलाई यस मुद्दामा अभियोजन गर्न माग गरेका हुन् ।

प्रकाशित मिति: सोमबार, जेठ २९, २०८०  १८:३५
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro