काठमाडौं । बैंक तथा वित्तीय संस्था परिसंघ नेपाल (सीबीफीन)ले चालु आर्थिक वर्षको मौद्रिक नीतिको समीक्षा गर्दै यो वर्ष बैंकहरूको नाफामा कमी आउने जनाएको छ । नेपाल राष्ट्र बैंकले मौद्रिक नीतिमार्फत बैंकदरमा गरिएको वृद्धिका कारण यो वर्ष बैंकको नाफा उल्लेख्य रूपमा नबढ्ने आकलन गरिएको हो ।
अनिवार्य नगद मौज्दात एवं वैधानिक तरलता अनुपातको सीमामा गरिएको वृद्धि, आयात गर्न राखिने मार्जिनलाई परिमार्जन गरी गरिने व्यवस्था, कर्जा प्रवाहको सीमामा संकुचनजस्ता कारणले तरलता व्यवस्थापनमा थप कठिनाइ हुने विज्ञप्तिमा उल्लेख छ ।
उत्पादनमूलक क्षेत्रमा लगानी विस्तार गर्दै आयात प्रतिस्थापन गर्ने र आत्मनिर्भर अर्थतन्त्रको निर्माणमा थप चुनौतीपूर्ण एवं यसबाट बैंक तथा वित्तीय क्षेत्रमा गरिएको लगानीको प्रतिफलमा संकुचन हुन जाने सीबीफीनको आकलन छ ।
अर्थतन्त्रका महत्त्वपूर्ण सूचकहरू ऋणात्मक दिशातर्फ उन्मुख हुँदै गर्दा नेपालको अर्थतन्त्र असहज बनिरहेको वर्तमान अवस्थालाई सहज बनाउनका लागि आर्थिक एवं वित्तीय स्थिरता कायम गर्न र खस्कँदो अर्थतन्त्रलाई लयमा फर्काउनका लागि समय सान्दर्भिक नीतिहरू मौद्रिक नीतिले अवलम्बन गरेको सीबीफीनको ठहर छ ।
बैंक तथा वित्तीय क्षेत्रबाट प्रवाह हुने कर्जाको वर्गीकरण गरी उत्पादनशील क्षेत्र र व्यापारमा जाने कर्जामा फरक ब्याजदर कायम गरिने, उत्पादनमूलक क्षेत्रको विकास एवं कर्जालाई उत्पादनशील क्षेत्रमा प्रवाह गराइने नीति सकारात्मक रहेको सीबीफीनको भनाइ छ ।
