काठमाडौं । लामो समयदेखि उपत्यकाभित्र बसेर कल वाइपास गर्ने सिरहाका राकेश गिरी फेरि पक्राउ परेका छन् । 
नेपाल प्रहरीको केन्द्रीय अनुसन्धान ब्यूरोले गिरीलाई चौथोपटक पक्राउ परेको हो । ब्यूरोको टोलीले उनलाई ललितपुरको कार्यविनायक ३ बाट पक्राउ गरेको ब्यूरोका प्रमुख डीआईजी नवराज सिलवालले बताए । 
“कल बाईपास गर्ने व्यक्तिउपर फितलो कानुन छ,” डीआईजी सिलवाल भन्छन्, “फितलो कानुन र कलवाईपास गर्दा धेरै आम्दानी हुने भएका कारण यो धन्दा फस्टाएको हो ।” 
उनले थपे, “गिरी यसभन्दा अघि ३ पटक पक्राउ परेर जेल सजाय काटिसकेका व्यक्ति हुन् । जेलबाट छुट्ने वित्तिकै उनको त्यही धन्दा सुरु हुन्छ, पक्राउ पर्दा सहजै छुट्न सहज हुन्छ, जरिबाना पनि धेरै हुँदैन ।” 
गिरी पहिलो पटक २०६३ साउनमा ललितपुरको ठेचोबाट पक्राउ परेका थिए । २४ दिन कैद भुक्तान र ५ लाख धरौटीमा रिहा भएका उनी पुनः कलवाईपासमै सक्रिय भए । 
२०६८ असार ३ गते काठमाडौंको जैसिदेवलबाट गिरी फेरि पक्राउ परे त्यसबेला उनी १ वर्ष कैद भुक्तान गरी छुटे । २०७१ असार ७ गते ललितपुरबाट पक्राउ परेका उनी १८ महिना जेल बसेर छुटे । जेलबाट छुटेलगत्तै फेरि उनी अवैध कल बाइपासमा सक्रिय देखिएको डिआइजी सिलवालले जनाए ।  गिरीले आफ्नो छोरालाई पनि कलवाईपास धन्दामा लगाएको प्रहरीले जनाएको छ । उनका छोरा गिरिश गिरी पनि २ पटक बाबुसँगै जेल परेर छुटिसकेका छन् ।