काठमाडौं । ‘फूलको ‘बुकी’ बोकेर मन्त्रीलाई भेट्न जाने, फोटो खिच्ने अनि त्यही फोटो धुलाएर साथमा बोक्ने । रातपरेपछि ‘बडीगार्ड’ बोकेर महङ्गा रेष्टुराँ छिर्ने । विदेश जाने भूत चढेका नागरिकलाई मन्त्रीसँग खिचिएका फोटो देखाउने र, आफूलाई पनि ठूलो मान्छे बताउने ।’ यो एउटा ठग नाइकेको दैनिकी हो ।   

केही समयदेखि विभिन्न बहानामा करोडौँ ठगी गर्ने इमाडोलका मनोजबहादुर सिंह फेरि प्रहरीको फन्दामा परेका छन् । 
पूर्व युवराज पारसको नाम बेचेर कुनै बेला काठमाडौंमा ठगी गिरोह चलाउने सिंह समय परिस्थितअनुसार भेष बदलेर ठगी गर्ने गर्छन् । पूर्व युवराज पारसको नामबाट ठगी गरे, पक्राउ परे । त्यसपछि राजपरिवार खानदानको परिचय दिँदै आर्मी, प्रहरी र राष्ट्रिय अनुसन्धान विभागमा जागिर लगाइदिने भन्दै दर्जनौँ युवालाई ठगी गरे । 

सिंहको त्यो ठगी धन्दाको पनि पर्दाफास भयो । उनले बेरोजगार युवा युवतीलाई बेलायत, अमेरिका तथा युरोपियन मुलुकमा सरकारी कोटामा पठाइदिने भन्दै ठगी गर्न थाले । 
प्रहरीको सूचीमा सिंह एक ‘प्रोफेशनल’ ठग हुन् । महानगरीय प्रहरी परिषर ललितपुरका प्रवक्ता डीएसपी ईश्वर कार्कीले बाह्रखरीसँग भने, “मन्त्रीको भ्रमण टोलीमा बेलायत र अमेरिका पठाइदिने भन्दै २९ जनासँग करोडौँ रुपैयाँ ठगी  गरेको खुल्यो ।” प्रवक्ता कार्कीका अनुसार यसअघि पनि सिंह ठगी र हातहतियारसम्बन्धी मुद्दामा पटकपटक कारबाही भोगेर छुटेका हुन् । 

“विभिन्न व्यक्तिलाई प्रयोग गर्दै मन्त्री तथा उच्च सरकारी अधिकारीसँग पुग्ने, फोटो खिच्ने त्यही फोटोलाई हतियार बनाएर नागरिक ठग्ने गरेका रहेछन्,” डीएसपी कार्कीले थपे । 
मन्त्रीको साथमा अमेरिका पठाईदिने भन्दै पर्वत शंकरपोखरीका विनोद सेवासँग २९ लाख असुलेर सम्पर्कविहीन भएका सिंहविरुद्व उजुरी गरेपछि ठगीको पर्दाफास भएको डीएसपी कार्कीले बताए । त्यसैगरी सिँहले कपनका सन्तोष कटवालसँग पनि  ९ लाख असुलेका थिए ।

सिँहले आफुलाई राजाबाबु’ र अनुप सिंह जस्ता उपनामबाट अरुलाई चिनाउँदै ठगी गर्ने गरेको प्रहरी अनुसन्धानबाट खुलेको छ । 
प्रहरीका अनुसार सिँहविरुद्ध वैदेशिक रोजगार विभागमा २०७० साउन २० मा ठगी मुद्धा दायर भएको थियो । 
रामकाजी श्रेष्ठ, प्रेमकुमार श्रेष्ठ, विष्णु गौतम, कमल गौतम, कृष्णकान्त गौतम, रिसव गौतम र हर्षमान गौतमलाई वैदेशिक रोजगारीमा युरोप, अमेरिका लैजाने भन्दै उनीहरुबाट लाखौं रकम ठगी गरे पछि उनीविरुद्ध मुद्दा दायर भएको थियो ।