विराटनगर । पाथीभरा मन्दिर (मुकुम्लुङ) क्षेत्रमा केबलकार निर्माण रोकी मन्त्रीस्तरीय वार्ता टोलीमार्फत समस्या समाधानको पहल गर्न माग गरिएको छ । आइतबार कोसी प्रदेशसभा बैठकमा प्रमुख प्रतिपक्ष दल नेकपा (माओवादी केन्द्र) संसदीय दलका नेता इन्द्रबहादुर आङ्बोले यस्तो माग गरेका हुन् ।

उनले भने, “आज प्रधानमन्त्रीको जन्मदिन पनि हो । तर, ताप्लेजुङको अवस्था हेर्दा रोम जलिरहेछ, निरो बाँसुरी बजाइरहेको छ भनेजस्तै भएको छ । सरकार के गरिरहेको छ ?”

ताप्लेजुङको आन्दोलनका विषयमा यसअघि पनि आफूहरूले सदनमार्फत संंघीय सरकारको ध्यानाकर्षण गराएको उनले उल्लेख गरे ।

आङ्बोले उक्त क्षेत्रमा केबलकार निर्माण कार्य तत्काल रोकिए स्थिति शान्त हुने बताए । “जुन ढंगले सरकारले चरम दमन गरेको छ, त्यो भर्त्सनायोग्य छ,” उनले भने, “वार्ताद्वारा समस्याको समाधान गरिनुपर्छ । ताप्लेजुङको आन्दोलनप्रति हाम्रो पनि नैतिक समर्थन छ । नगरिकले चाहिँदैन भनेको विकासप्रति सरकार किन जबर्जस्ती गरिरहेको छ ? प्राप्त गर्ने चिज के हो ?”

नेकपा (एमाले) संसदीय दलका उपनेता तिलकुमार मेन्याङ्बोले संघीय सरकारले यसअघि नै वार्ता टोली बनाए पनि समस्या समाधान नभएको बताए । शान्तिपूर्ण रूपमा समस्या समाधान गरिनुपर्ने उनले माग गरे ।

उनले भने, “मुकुम्लुङ क्षेत्रमा केबलकार बनाउनुपर्छ कि पर्दैन वा बनाउनुपर्छ भनेर मानिसहरू विभाजित भएकोले यो परिस्थितिको चाँडो अन्त्य गरिनुपर्छ । वार्ताबाट नै नेपाल सरकार र आन्दोलनरत पक्षबीच बनाउने वा नबनाउने के गर्ने वा बीचको बाटोबाट समस्या समाधान गर्ने हो निर्क्योल गरिनुपर्छ ।”

पाथीभरा (मुकुम्लुङ)मा निजी क्षेत्रबाट केबलकार बनाउने विषयले विवाद उत्पन्न भएको उनले बताए ।

राष्ट्रिय प्रजातन्त्र पार्टी (राप्रपा) संसदीय दलका नेता भक्तिप्रसाद सिटौलाले ताप्लेजुङको समस्याबारे सरकार गम्भीर नदेखिएको आरोप लगाए । समस्या समाधानमा चाँडो निर्णय गर्न भन्दै उनले संघीय सरकारको ध्यानाकर्षण गराए ।

उनले भने, “यो समस्यामा कोसी सरकार के हेरेर बसेको छ, कोसी सरकारले मध्यस्थता गर्नु पर्दैन ? किन मध्यस्थता गर्दैन ? कि केन्द्रीय नेतृत्व पालना मात्र गर्ने दायित्व मात्र त होइन होला ?” उनले स्थानीय जनतासँग समन्वय गरेर समस्या समाधान गरिनुपर्नेमा जोड दिए ।