काठमाडौं । काठमाडौंको दक्षिणकालीको वन क्षेत्रमा डढेलो फैलिएको छ । बुधबार (फागुन ७) अपराह्न ४/५ बजेदेखि डढेलो लागेको दक्षिणकाली नगरपालिकाका प्रमुख मोहन बस्नेतले बताए । डढेलो निभाउने प्रयास गरिए पनि पूर्ण रूपमा नियन्त्रण गर्न नसकिएको उनले जानकारी दिए ।

हालसम्म दक्षिणकाली–४, ३ र १ को जंगल क्षेत्रमा डढेलो फैलिएको र यसले ३० हेक्टरभन्दा बढी वन क्षेत्र जलिसकेको उनले बताए । नगर प्रहरी, जनपथ प्रहरी तथा स्थानीय उपभोक्ता डढेलो निभाउन खटिएका छन् ।

नगरप्रमुख बस्नेतले भने, “हिजोभन्दा डढेलो केही नियन्त्रणमा आएको छ, तर ठूटामा सल्किएको आगो फेरि फैलिने डर कायमै छ ।”

उनले सडकमार्गले काटेको क्षेत्र भएकाले बस्तीमा आगो सल्कने सम्भावना हाललाई टरेको बताए । दक्षिणकाली–४, बाँसबारी क्षेत्रबाट डढेलो फैलिएको उनले जानकारी दिए । रासस