काठमाडौं । यो साताको अन्तिम दिन बिहीबार नेप्से परिसूचक २५८८.६२ विन्दुमा बन्द भयो । दुई हप्ताअघि पुस १८ गते बिहीबार पनि बजार २५८६.२३ विन्दुमै बन्द भएको थियो । गएको हप्ताको पाँच कारोबार दिनमा सेयर बजार जति बढ्यो, यो साता त्यति नै घट्यो ।

नेपाल स्टक एक्सचेन्ज (नेप्से)का अनुसार, यो साता बजार ४६.४५ अंकले घटेको छ । गत साता पाँच कारोबारमध्ये एक दिन बजार घटेको थियो । समग्रमा बजार ४८.८४ अंकले बढेको थियो ।

गएको साताको अन्तिम कारोबार दिन पुस २५ गते नेप्से परिसूचक २६३५.०९ विन्दुमा पुगेको थियो । तर, उक्त विन्दुबाट बजार पुनः ओरालो लागेको छ ।

सामान्य अवस्थामा सातामा पाँच दिन सेयर कारोबार हुँदै आएको छ । यो हप्ता माघ १ गते पनि सार्वजनिक बिदाका कारण सेयर बजार बन्द भयो । यो साता चार दिन सेयर कारोबार भयो । त्यसमध्ये तीन कारोबार दिन बजार घट्यो । एक कारोबार दिन बुधबार नेप्से झिनो अंकले बढ्यो ।

यो बुधबार नेप्से १.८३ अंकले बढ्यो । आइतबार २५.४१, सोमबार १५.५४ र बिहीबार ७.३३ अंकले नेप्से परिसूचक घटेको हो ।

यो साता चार कारोबार दिनमा २२ अर्ब ४० करोड ७४ लाख रुपैयाँको सेयर खरिद–बिक्री भयो । गएको साताको तुलनामा कारोबार रकममा कमी आयो । गएको साता ३० अर्ब २६ करोड ३६ लाख रुपैयाँको सेयर किनबेच भएको थियो । यो साता सेयर कारोबार रकममा सात अर्ब ८५ करोड ६२ लाख रुपैयाँले कमी आएको हो ।

फाइनान्स समूहका लगानीकर्ताले सर्वाधिक गुमाए
नेप्सेका अनुसार, यो साता सर्वाधिक गुमाउनेमा फाइनान्स समूहका लगानीकर्ता छन् । यो साताको अन्तिम कारोबार दिन फाइनान्स समूहका सबै १५ कम्पनीको सेयर मूल्य घट्यो । उक्त दिन फाइनान्स समूह समग्रमा ५.१९ प्रतिशतले घटेको हो ।

पछिल्लो एक सातामा सर्वाधिक गुमाउनेमा फाइनान्स समूहका लगानीकर्ता छन् । एक हप्तामा यो समूहका लगानीकर्ताको सेयर मूल्य औसत १२.९६ प्रतिशतले घटेको छ ।