काठमाडौं । नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले हिंसात्मक नीति अवलम्बन गर्ने शासकको पछि नलाग्न इजरायली नागरिकलाई आग्रह गरेका छन् । प्यालेस्टाइनीमाथि इजरायली ‘जनसंहार’विरुद्व देशव्यापी हस्ताक्षर अभियानको सोमबार काठमाडौंको रत्नपार्कमा उद्घाटन गर्दै उनले यस्तो बताएका हुन् ।

उनले न्याय, सत्यको पक्षमा र अन्याय र अत्याचारको विरुद्धमा दृढतापूर्वक उभिन आग्रह गरे । नेपालले न्यायको पक्षमा उभिने संकल्प गर्नुपर्ने उनले बताए ।

प्यालेस्टाइनीमाथि इजरायलको क्रूरता निन्दनीय रहेको उनले उल्लेख गरे । उनले नेपालले न्याय र अन्यायलाई छुट्ट्याउन सक्नुपर्नेमा जोड दिए ।

“न्याय, सत्यको पक्षमा उभिनुपर्छ र अन्याय र अत्याचारको विरुद्धमा, फासिजमको विरुद्धमा हामी दृढतापूर्वक उभिनुपर्छ,” उनले भने, “हाम्रो देश नेपालले न्यायको पक्षमा उभिने संकल्प गर्नुपर्छ । गर्दै आएको पनि छ ।”

उनले अगाडि भने, “अहिलेको सरकारले जसरी जघन्य मानवअधिकारको हनन, मानवअधिकारको जघन्य हनन भइरहेको छ, हत्या भइरहेको छ, क्रूरताको पराकाष्ठामा प्यालेस्टाइनीमाथि जसरी व्यवहार भइरहेको छ, त्यो निन्दनीय र खेदजनक छ ।”

अध्यक्ष नेपालले नेपाल इजरायल र प्यालेस्टाइनको युद्धबारे तटस्थ बस्नु भर्त्सनायोग्य रहेको बताए ।

गाजा–प्यालेस्टाइन युद्ध सुरु भएको १४ महिनापछि सोमबारदेखि पूर्वप्रधानमन्त्रीसहितका नेताहरूले हस्ताक्षर अभियान थालेका हुन् । न्युज एजेन्सी नेपाल