काठमाडौं । अमेरिकी सहायक विदेशमन्त्री डोनाल्ड लुले पूर्वप्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’सँग भेटवार्ता गरेका छन् । प्रचण्डको निवास खुमलटारमा आइतबार उनीहरूबीच भेटवार्ता भएको हो ।

अध्यक्ष प्रचण्डले अमेरिकी सहायक विदेशमन्त्री लुको नेपाल भ्रमण फलदायी हुने विश्वास व्यक्त गरे । उनले नेपाल र अमेरिकाबीच लामो समयदेखि सम्बन्ध रहेको उल्लेख गरे । यस्ता भ्रमण र भेटवार्ताले आपसी सम्बन्धलाई थप बलियो बनाउने उनको विश्वास छ ।

नेपालको आर्थिक विकासका निम्ति अमेरिकाले गरिरहेको सहयोगका निम्ति उनले धन्यवाद ज्ञापन गरे । उनले सबैको सहयोग र सद्भावबाट अघि बढ्ने बताए ।

नेपाल आर्थिक समृद्धिको बाटोमा अघि बढ्न खोजिरहेको उनले उल्लेख गरे । यसमा अमेरिकालगायत अन्तर्राष्ट्रिय समुदायको सहयोग र सद्भाव महत्त्वपूर्ण हुने उनले बताए ।

“हामीले कृषिलाई आधार मानेर ऊर्जा र पर्यटन विकासलाई जोड दिने नीति लिएका छौँ,” उनले भने, “सबै क्षेत्रमा सूचना प्रविधिलाई लिडिङ रोलमा राखेर मात्रै नेपाललाई समृद्ध बनाउन सकिन्छ भन्ने हाम्रो विश्वास रहेको छ । यसका लागि अन्तर्राष्ट्रिय समुदायबाट हुने सहयोग र लगानी महत्त्वपूर्ण हुन्छ ।”

अध्यक्ष प्रचण्डले नेपालको शान्ति प्रक्रिया राष्ट्रिय सहमतिका साथ मौलिक रूपमा सम्पन्न हुन थालेको जानकारी गराए । उनले यसमा अन्तर्राष्ट्रिय समुदायको सद्भावका निम्ति धन्यवाद व्यक्त गरे ।

“हामीले नेपालमा शान्ति प्रक्रिया बहुमत र अल्पमत वा सत्तापक्ष र विपक्षीको रूपमा नलिएर राष्ट्रिय सहमतिका साथ टुंग्याउँदै छौँ । यो हाम्रा लागि मात्र होइन, शान्ति र स्थायित्व चाहने अन्तर्राष्ट्रिय समुदायकै लागि पनि खुसीको कुरा हो,” उनले भने, “टीआरसी विधेयक पारित भएपछि जसरी अन्तर्राष्ट्रिय समुदायले स्वागत गरेको छ, यसले हामीलाई खुसी बनाएको छ ।”

अन्तर्राष्ट्रिय क्षेत्रमा देखिएको तनावप्रति नेपालको गहिरो चासो रहेको उनले उल्लेख गरे । यसबाट नेपालमा पर्न सक्ने असरप्रति आफूहरू संवेदनशील रहेको उनले बताए ।

नेपाली युवा विपीन जोशी हालसम्म पनि बेपत्ता रहेको घटना नेपालका निम्ति चिन्ताको विषय रहेको पनि उनले बताए । विपीन जीवितै रहेको हालै इजरायली पक्षबाट जानकारी आउनु सुखद भएको भन्दै उनले जतिसक्दो चाँडो रिहाइका निम्ति अन्तर्राष्ट्रिय समुदायको ध्यान जानुपर्नेमा जोड दिए ।

अमेरिकी सहायकमन्त्री लुले नेपालको प्रगति आफूहरूका निम्ति खुसीको विषय हुने भन्दै सबै प्रकारका सहयोग र सद्भाव बढाउँदै लैजाने बताए । उनले नेपालको शान्ति प्रक्रिया राष्ट्रिय सहमतिका साथ टुंगिन लागेकामा खुसी व्यक्त गरे । अन्तर्राष्ट्रिय समुदायका निम्ति यो सुखद खबर भएको उनले बताए ।

नेपालको आर्थिक विकासका निम्ति अमेरिकाले निरन्तर सहयोग गर्दै आएको उनले उल्लेख गरे । अमेरिकी सरकारले मात्र नभई जनताले पनि नेपालको विकासका निम्ति सहयोग गर्दै आएको उनले बताएका प्रचण्डको सचिवालयले जानकारी गराएको छ ।