मुगु । रारा विमानस्थलमा निर्माणाधीन टर्मिनल भवनको काम अन्तिम चरणमा पुगेको छ । खानेपानी तथा सरसफाइ, रङरोगनबाहेक निर्माणको सबै काम सकिएको छ ।

भवन निर्माणको निर्धारित समयावधिमा काम सम्पन्न नभएपछि पटक–पटक गरी चारपटक म्याद थप गरिएको थियो । विमानस्थलस्थित टर्मिनल बिल्डिङ एन्ड कन्ट्रोल टावरका आयोजना प्रमुख महेश नेपालीले हालसम्म ८५ प्रतिशत काम सम्पन्न भएको जानकारी दिए ।

०७६ असोज १६ गते नेपाल नागरिक उड्डयन प्राधिकरणअन्तर्गत एरोड्रम इन्जिनियरिङ विभाग र ओम बुद्ध इन्टरनेसनल प्रालिबीच ट्रमिनल भवन निर्माणका निम्ति सम्झौता भई  सोही वर्षको कात्तिक १ गतेदेखि काम थालिएको थियो । विभिन्न बहाना बनाउँदै पहिलो सम्झौता अवधिको तीन वर्षमा काम सम्पन्न नभएपछि हालसम्म चारपटक म्याद थपिएको आयोजना प्रमुख नेपालीले बताए ।

निर्माण कम्पनीका प्रतिनिधि विवेक श्रेष्ठले मौसमले साथ नदिएको अवस्थामा बाहेक करिब ३० दिनभित्र बाँकी कार्य सम्पन्न गरी भवन हस्तान्तरण गर्ने गरी काम भइरहेको जानकारी दिए । भौगोलिक कठिनाइ, यातायातको असुविधा, विभिन्न समयमा वर्षाले बाटो अवरुद्ध हुनु, दक्ष कामदारको अभावलगायत कारणले समयमा निर्माण सम्पन्न गर्न नसकिएको उनले स्वीकार गरे ।

विमानस्थलको टर्मिनल भवन निर्माणको प्रगति र ढिलाइबारे जानकारी लिन बुधबार जिल्ला समन्वय समितिका संयोजक मञ्जनबहादुर कार्कीको संयोजकत्वमा कर्णाली प्रदेशका सांसदद्वय जितबहादुर मल्ल र मंगलबहादुर शाही, प्रमुख जिल्ला अधिकारी कमलप्रसाद पाण्डेका साथै जनपथ, सशस्त्र प्रहरी, राष्ट्रिय अनुसन्धान विभागका प्रमुख, नागरिक अगुवासहितको टोलीले त्यहाँको निरीक्षण गरिएको थियो । 

निरीक्षणपछि भवन यथाशीघ्र सम्पन्न गर्न निर्माण कम्पनीलाई ताकेता गरिएको जिल्ला समन्वय समितिका प्रमुख कार्कीले बताए । वर्षाले विमानास्थलको मुनितिर क्षति पुगी पहिरोको जोखिममा परेकाले उक्त समस्या समाधानका निम्ति सरोकार भएका निकायमा आवश्यक पहल र समन्वय गर्ने निर्णय पनि गरिएको उनले जानकारी दिए ।

सुविधासम्पन्न ट्रमिनल भवन, यात्री सहायता कक्ष र प्रतीक्षालय नहुँदा विमानस्थलबाट बाहिरिने र भित्रने यात्रीले चर्को घाम लाग्दा, झरी, हिउँ पर्दा तथा जाडोयाममा सास्ती भोग्दै आएका छन् । नागरिक उड्डयन कार्यालयले लामो समयदेखि काठको टहराबाट एयर ट्राफिक कन्ट्रोलको कार्य गर्दै आएको जनाएको छ । रासस