काठमाडौं । नेपालका निम्ति चांगानको आधिकारिक बिक्रेता एमएडब्ल्यू वृद्धिले पोखरामा दिपल ईभी सार्वजनिक गरेको छ । एक कार्यक्रमको आयोजना गर्दै कम्पनीले गएको शुक्रबार दिपल ईभी सार्वजनिक गरेको हो ।

कार्यक्रममा गण्डकी प्रदेशका सामाजिक विकास, युवा तथा खेलकुदमन्त्री बिन्दुकुमार थापा, नेपाली क्रिकेट टिमका पूर्वकप्तान तथा दिपल ईभीका ब्रान्ड एम्बास्डर पारस खड्का, चांगानको पोखरा डिलर हिमालय अर्गनाइजेसनकी संस्थापक मिलन थापा र डाइरेक्टर सौरभ थापाले दिपल एस०७ र एल०७ ईभी सार्वजनिक गरेका हुन् ।

दिपल ईभी सार्वजनिक गर्दै प्रदेशका मन्त्री थापाले पोखरामा चांगानको सफलताको कामना गर्दै यो र अरू ब्रान्डले बिक्री मात्र नभएर त्यसपछिको सेवा र ग्राहक सन्तुष्टिलाई पनि प्राथमिकतामा राख्नुपर्ने बताए ।

यस्तै, ब्रान्ड एम्बास्डर एवं नेपाल क्रिकेट संघका सचिव समेत रहेका खड्काले दिपल ‘ईभी भ्यालु फर मनि’ भएको बताए । “यसमा यति धेरै फिचरहरू छन् कि जुन अझै पनि अन्य ब्रान्डका ईभीमा उपलब्ध छैन,” उनले भने, “म दिपलको पफर्मेन्सबाट पूर्ण रूपमा सन्तुष्ट छु । म पोखरालाई आफैँ आएर दिपलको प्रविधि र फिचरको फस्ट ह्यान्ड अनुभव गर्न आग्रह गर्न चाहन्छु ।”

चांगान पोखराकी संस्थापक थापाले दिपल ब्रान्डलाई लिएर आफू निकै उत्साहित रहेको बताइन् । “औपचारिक रूपमा पोखरामा सार्वजनिक हुनुभन्दा पहिले नै हामीले बजारबाट निकै राम्रो प्रतिक्रिया पाउन थालिसकेका छौँ,” उनले भनिन् ।

दिपलमा वेलकम सिट, सनफ्लावर टचस्क्रिन, अग्मेन्टेड रियालिटी हेडअप डिस्प्ले, जेस्चर कन्ट्रोल, हेडरेड र आउट डोर स्पिकरलगायत १५ भन्दा बढी फस्ट टाइम फिचरहरू छन् । यो ईभी नेपाली बजारमा छोटो समयमै लोकप्रिय बन्न सफल भएको कम्पनीको जिकिर छ ।

एमएडब्ल्यू वृद्धिले अर्को साता पोखराकै सबैभन्दा ठूलो एक्सचेन्ज एन्ड टेस्ट ड्राइभ क्यामको आयोजना गर्दै दिपल, सेरस र नामीले नाडा अटो शोमा जारी गरेको विशेष अफर उपलब्ध गराइने जनाएको छ ।

ग्राहकले हरेक टेस्ट ड्राइभ र पुरानो गाडीको मूल्यांकनमा आकर्षक उपहार पाउने र ‘अनस्पट फाइनान्सिङ’ एवं ‘अनस्पट डेलिभरी’ पनि लिन सक्ने कम्पनीले जनाएको छ ।