काठमाडौं । नेपालको पहिलो निजी क्षेत्रको जीएसएम मोबाइल सेवा प्रदायक कम्पनी एनसेलले ‘एनसेल फाउन्डेसन’को घोषणा गर्दै आफ्नो १९औँ वार्षिकोत्सव मनाएको छ । कम्पनीले एनसेल फाउन्डेसनमार्फत व्यावसायिक सामाजिक जिम्मेवारी (सीएसआर)का परियोजना सञ्चालन गर्ने बताएको छ ।

एनसेलले नेपाल र आमनेपालीलाई दूरसञ्चार सेवामार्फत जोड्न थालेको १९ वर्ष पूरा भएको अवसरमा काठमाडौंमा एक कार्यक्रमको आयोजना गरी वार्षिकोत्सव मनाएको हो । 

एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले कम्पनीका सबै राम्रा कार्यलाई एउटै उदेश्य र छातामुनि ल्याउनु महत्त्वपूर्ण भएको बताउँदै एनसेल फाउन्डेसनको स्थापना गरिएको बताए । उनले भने, “विगतका १९ वर्षमा एनसेलले एक करोड ३० लाखभन्दा बढीको जीवनमा प्रत्यक्ष र अप्रत्यक्ष रूपमा लाभ प्रदान पार्दै स्वास्थ्य, शिक्षा, वातावरणलगायत विभिन्न क्षेत्रमा सामाजिक कार्य गरी दुई अर्ब रुपैयाँ (एक करोड ५० लाख अमेरिकी डलर) भन्दा बढीको योगदान गरेको छ ।” 

एनसेलले थप समावेशी, कनेक्टेड र दिगो नेपाल विकासमा सघाउन एवं दिगो विकासका लक्ष्यहरू प्राप्तिका लागि योगदान पुर्‍याउनु फाउन्डेसनको भिजन रहेको बताएको छ । सामाजिक कार्यमा सहयोग गर्ने, डिजिटल डिभाइडलाई कम गर्ने र थप स्वस्थ, दिगो र समृद्ध नेपाललाई बढावा दिने मुख्य उदेश्य छ ।  एनसेलले बृहत्तर हितको पक्षमा सामाजिक कार्य गर्दै आएको बताएको छ ।

यस्तो छ सामाजिक क्षेत्रमा गरेको योगदान
२०७२ सालको विनाशकारी भूकम्पपछि एनसेलले भूकम्प प्रभावित परिवारहरूको सहयोगार्थ प्रधानमन्त्री राहत कोषमा १० करोड रुपैयाँ प्रदान गरेको बताएको छ । साथै आफ्ना परिवारजन तथा आफन्तसँग सम्पर्कमा रहेर कम्पनीले ग्राहकहरूलाई एक अर्ब ६० करोड बराबरको सेवा सुविधा निःशुल्क उपलब्ध गराएको कम्पनीले जनाएको छ ।

कोभिडको महामारीका बेलामा सरकारले कोरोना भाइरस संक्रमण रोकथाम, नियन्त्रण तथा उपचारका लागि स्थापना गरेको कोषमा १० करोड रुपैयाँ योगदान गर्ने एनसेलले आफू पहिलो निजी कम्पनी भएको बताएको छ । गत वर्षको जाजरकोट भूकम्पपछि एनसेलले पीडितको उद्धार, उपचार र राहतमा तत्काल सहयोग पुर्‍याउन कर्णाली प्रदेश सरकारलाई ५० लाख रुपैयाँ सहयोग र भूकम्प प्रभावित क्षेत्रका १० विद्यालयलाई कक्षा कोठा बनाउन पनि सहयोग गरेको जनाएको छ । 

कम्पनीले २०७१ सालमा देशका विभिन्न भागमा आएको बाढी र पहिरोजस्ता विपद् पीडितलाई सहयोग गर्न प्रधानमन्त्री प्राकृतिक विपत्ति राहत कोषलाई २० करोड सहयोग प्रदान गराएको जनाएको छ । 

१९औँ वार्षिकोत्सवको कार्यक्रममा एनसेलले आगामी पाँच वर्षमा कम्पनीले कम्तीमा २० करोड रुपैयाँ सामाजिक क्षेत्रमा योगदान गर्ने प्रतिबद्धता जनाएको छ । 

“एनसेलले टावर राख्ने, दूरसञ्चार सेवा प्रदान गर्ने र रोजगारी दिने काम मात्र गर्दैन । सीएसआरमा दिगो, प्रभावकारी र ‘हामी तपाईंकै लागि’ थिमअनुसार काम गर्दै नेपालमा एक उदाहरणीय कम्पनीका रूपमा स्थापित हुने लक्ष्यसहित अगाडि बढेको कम्पनी पनि हो,” जाब्बोरले भने ।

कार्यक्रममा एनसेलले हालै मात्र पेरिस पारालिम्पिक्स २०२४ मा नेपालको लागि पहिलो पदक जितेर इतिहास रचेकी पारा खेलाडी पलेशा गोवर्धनलाई सम्मान गरेको छ । जाब्बोरले गत वर्ष नै एनसेलले पारालिम्पिक कमिटीलाई सहयोग प्रदान गरेको बताए । उनले भने, “एक वर्षअघि एनसेलको वार्षिकोत्सवको अवसरमा हामीले पारालिम्पिक कमिटी नेपालसँग भेट गरी हामी तपाईंहरूको संस्थामार्फत पारा खेलाडीहरूको विकासको लागि सहयोग गर्न चाहन्छौँ भन्दा उहाँहरूले विश्वास नै गर्न सक्नुभएको थिएन । यो एक नितान्त सामाजिक पहलअन्तर्गत जहाँ सहयोग पुगेको छैन त्यो क्षेत्रमा सहयोग पुर्‍याउने उद्देश्य अनुरुप गरिएको सहकार्य थियो ।” 

आफ्नो ब्रान्डको बाचा ‘आज, भोलि सधैँ सँगै’ र एनसेल फाउन्डेसनको शुभारम्भसँगै एनसेलले आफ्नो सामाजिक कार्यको धरातललाई अझै फराकिलो पार्दै समुदायको तल्लो स्तरमा सामाजिक पहलहरूका साथ धेरैभन्दा धेरै मानिसलाई लाभान्वित गर्ने उद्देश्य लिएको बताएको छ ।

नाइन्टिन फर नाइन्टिन’ परियोजनाको घोषणा
एनसेल फाउन्डेसनसँगै १९औँ वार्षिकोत्सवको उपलक्ष्यमा कम्पनीले ‘नाइन्टिन फर नाइन्टिन’ परियोजनाको घोषणा गरेको छ । यस पहलअन्तर्गत सातै प्रदेशबाट छानिएका कुल १९ वटा सामाजिक कार्यका योजना कार्यान्वयन गरिने र प्रत्येक आयोजनाले १० लाख ‘सीड फन्ड’को रूपमा सहयोग प्राप्त गर्नेछन् । गत वर्ष छनोटमा परेका ‘एटीन फर एटीन’ अन्तर्गतका १८ परियोजना प्रदेशस्तरमा कार्यान्वयनमा रहेको बताएको छ । 

सन् २००५ मा आजकै दिन अर्थात् सेप्टेम्बर १७ बाट एनसेल (पहिले मेरो मोबाइल)ले आफ्नो सेवा सञ्चालनमा ल्याउँदै यात्रा सुरु गरेको थियो । त्यसबेलादेखि नै कम्पनीले आफ्ना सेवाहरू प्रदान गर्दै नेपालको दूरसञ्चार क्षेत्रमा आमुल परिवर्तन ल्याएको छ र सेवामा पहुँच सुनिश्चित गराउँदै ग्राहक सेवामा व्यापक परिवर्तन ल्याउनमा ठूलो योगदान दिएको बताएको छ । 

‘‘यो यात्रा हाम्रो ग्राहक, साझेदारहरू, सरकारी निकाय तथा नियामक निकायको बलियो साथ र भरोसबिना सम्भव थिएन । यसलाई आगामी दिनको लागि आत्मसाथ गर्दै नेपाललाई डिजिटल भविष्यतर्फ डोहोर्‍याउन हामी तत्पर छौँ,’’ जाब्बोरले भने । 

नेपालको एक ठूलो करदाताको रूपमा एनसेलले आफ्नो स्थापनाकालदेखि आजसम्म तीन खर्ब २० अर्बभन्दा बढी सरकारलाई कर तथा शुल्क बुझाइसकेको बताएको छ । 

सर्वसाधारणलाई भरपर्दो आधारभूत मोबाइल सेवा टूजी, थ्रीजी हुँदै फोरजी सेवा, वायरलेस मोबाइल ब्रोडब्यान्डदेखि प्वाइन्ट टू प्वाइन्ट कनेक्टिभिटी र मोबिलिटी सेवादेखि क्लाउड र डेटा सेन्टरसेवासहित नेपाली व्यवसायलाई उनीहरूका सञ्चार आवश्यकता पूरा गर्न नवीनतम् सेवा प्रदान गर्दै आएको एनसेलको भनाइ छ ।

वार्षिकोत्सवको अवसरमा एनसेल फाउन्डेसनले वृक्षारोपण, शैक्षिक सामग्री वितरण, स्वास्थ्य शिविर, पाठेघरको मुखको क्यान्सर स्क्रिनिङ, रक्तदान कार्यक्रम, स्किल क्याम्प लगायतका विभिन्न कार्यक्रम आयोजना गर्ने बताएको छ । यसका साथै एनसेल व्यवस्थापनका उच्चपदस्त अधिकारीहरू र अन्य कर्मचारीहरू ग्राहकहरूसँग अन्तर्क्रिया गर्न र उनीहरूको माया र निरन्तर सहयोगका लागि व्यक्तिगत रूपमा धन्यवाद दिन देशका विभिन्न भागमा रहेका एनसेल सेन्टरहरू र पोइन्ट अफ सेल्सको भ्रमण पनि गर्ने कम्पनीले जनाएको छ ।