काठमाडौं । नेपाली कांग्रेसका राष्ट्रियसभा सदस्य नारायणदत्त मिश्रले नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले देश बंगलादेश बन्दै भनेर भ्रम पैदा गरेको भन्दै आपत्ति जनाएका छन् । मंगलबार राष्ट्रियसभा बैठकमा उनले यस्तो आपत्ति जनाएका हुन् ।

केही समयअघि ‘देश श्रीलंका बन्छ’ भन्दै हल्ला र अहिले ‘बंगलादेश बन्छ’ भन्ने भ्रम पैदा गरिएको उनले बताए । बंगलादेश नेपालमा रेल चढाएर ल्याउने कि हवाईजहाजबाट ? भन्दै उनले प्रश्न गरे ।

पूर्वप्रधानमन्त्रीजस्तो मान्छेले जनतामा भ्रम पैदा गर्न नहुने भन्दै उनले सचेत गराए । “विदेशी मुद्राको सञ्चिति खत्तम छ भनेर हल्ला मच्चाएका छन् । देश श्रीलंकाजस्तो हुन्छ, नेपाल श्रीलंकाजस्तो बन्छ भन्नेहरू पनि छन्,” उनले भने, “उनीहरूका लागि विदेशी मुद्राको सञ्चिति बढेर गएको छ । अहिले अर्को थरीले बंगलादेशको हल्ला गर्दै छन्, बंगलादेशजस्तो नेपालमा ल्याउने, बंगलादेश नेपालमा रेल चढाएर ल्याउँछन् कि हवाईजहाज चढाएर ल्याउँछन् ? बंगलादेशको आन्दोलन ल्याउँछु भन्दै छन् ।”

सांसद मिश्रले सरकारले जनतालाई आशा जगाउने काम गर्नुपर्नेमा जोड दिए । न्युज एजेन्सी नेपाल