विराटनगर । कोसीमा नेकपा (माओवादी केन्द्र)ले सरकारमै सहभागी नहुँदै नेपाली कांग्रेस सदनमा सत्तापक्ष भएर बसेको विषयमा प्रश्न उठाएको छ ।

शुक्रबार कोसी प्रदेशसभा बैठकको विशेष समयमा माओवादी केन्द्र संसदीय दलका नेता इन्द्र आङ्बोले मुख्यमन्त्रीलाई समर्थन नगरेको र अहिलेसम्मको सरकारमा गएको औपचारिक जानकारी पनि नआएको अवस्थामा कांग्रेस कसरी सत्तापक्ष भयो भन्दै प्रश्न गरे । 

उनले भने, “मुख्यमन्त्री बनाउने कुरामा कांग्रेसको समर्थन छैन, कुनै सांसदले हस्ताक्षर गरेको थाहा छैन । तर सरकारमा कांग्रेस सहभागी भएको पनि औपचारिक जानकारी छैन । तर, सदनमा सत्तापक्ष भएर बसेको छ ।”

उनले सरकारलाई समर्थन नगरी कसरी सरकार पक्षमा बसेको हो ? भन्दै प्रश्न गरे । “कि सरकारलाई समर्थन हुनुपर्‍यो, कि सहभागी हुनुपर्‍यो । यो खालको भूमिका संसदीय प्रणालीमा सुहाउँदैन,” उनले भने ।

कोसीमा धेरै भएको मन्त्रालय घटाएको र सुशासनमा सबैभन्दा धेरै सफलता दिएको भन्ने मुख्यमन्त्री हिक्मत कार्कीले दाबी गरेको भन्दै आङ्बोले त्यो अडानमा टिक्न सुझाव दिए ।

“तर, राज्यमन्त्रीको लस्कर लगाउनु हुने छैन भन्ने विश्वास छ,” उनले भने, “नीति तथा कार्यक्रम र बजेट कार्यान्वयन हुन मन्त्रालयहरू खाली हुनु हुँदैन । तर, कोसीमा धेरै मन्त्रालय खाली छन् ।”

उनले कोसी प्रदेश सरकारविहीनको अवस्थामा रहेको आरोप लगाउँदै संसद् सरकारको लाचार छायाँ हुनुहुँदैन भने । माओवादी औपचारिकरूपमा प्रतिपक्षी दल भएको र सरकारलाई दिएको समर्थन फिर्ता लिएको सदनलाई जानकारी गराए ।

“हामी प्रतिपक्षमा छौँ । ध्वंसात्मक, अतिवादीभन्दा पनि रचनात्मक भूमिका हुने छ । हाम्रो दल र पार्टी रचनात्मक प्रतिपक्षको भूमिका निर्वाह गर्ने छौँ,” उनले भने ।

आङ्बोले अहिलेको बजेटले गुणात्मक परिणाम दिन नसक्ने पनि दाबी गरे ।