काठमाडौं । राष्ट्रियसभाका सांसदले सोलुखुम्बुमा हिमताल फुटेर आएको भीषण बाढीबारे अनुसन्धान गरिनुपर्नेमा जोड दिएका छन् । आइतबार राष्ट्रियसभा बैठकको आकस्मिक र शून्य समयमा सांसदहरूले बाढीपहिरो प्रभावितलाई राहत उपलब्ध गराउन पनि माग गरे ।

नेपाली कांग्रेसका सांसद कृष्णबहादुर रोकायाले हिमताल एक्कासि कसरी फुट्यो भन्नेबारे अनुसन्धान गरिनुपर्ने बताए । “टासीलाम्चामा रहेको दुईवटा हिमताल फुटेको भनिएको छ । अझै थप दुई हिमताल पनि फुट्ने जोखिमा रहेको भनिएको छ । यी ताल एक्कासि कसरी फुटे भन्नेमा अनुसन्धान हुन जरुरी छ,” उनले भने ।

थप ताल फुट्न सक्ने जोखिमप्रति सरकार गम्भीर हुनुपर्ने उनले उल्लेख गरे ।

नेकपा (एकीकृत समाजवादी)की सांसद जयन्तीदेवी राईले जलवायु परिवर्तनका कारण यस्तो घटना भएको हुन सक्ने आशंका व्यक्त गरिन् । “जलवायु परिवर्तनको कारण पनि हुनसक्छ । निरन्तर हिउँ जम्ने ठाउँमा यो घटना घट्नु भनेको हिमाली क्षेत्र कहीँ सुरक्षित छैन भन्ने हो,” उनले भनिन् ।

नेकपा (एमाले)की सांसद रुक्मिणी कोइरालाले बाढीपहिरो प्रभावितलाई क्षतिपूर्ति उपलब्ध गराउन माग गरिन् । उनले बढ्दो जलयवायु परिवर्तनका कारण यस्ता घटना भएको भन्दै सरकारको ध्यानकर्षण गराइन् ।

नेकपा (माओवादी केन्द्र)का सांसद गोपीबहादुर सार्की अछामीले पुनर्निर्माण वा बस्ती स्थानान्तरण गर्ने भन्नेमा सरकारले ध्यान दिनुपर्ने बताए । “अब पुनर्निर्माण गर्ने या पुनर्वासको व्यवस्था गर्ने हो, सरकारले त्यसमा ध्यान दिनुपर्छ । प्राकृतिक प्रकोपबाट हुने घटनामा सरकार पूर्वतयारीको अवस्थामा रहनुपर्छ,” उनले भने । नेपालका ४७ हिमताल जोखिममा रहेको उनको भनाइ छ ।

गएको शुक्रबार दुई हिमताल फुट्दा सोलुखुम्बुको खुम्बु पासाङल्हामु गाउँपालिका–५, थामेखोलामा भीषण बाढी आएको थियो ।